Жамбыл облысының әкімі Ербол Қарашөкеев Тараздағы Тлендиев атындағы мектеп-интернаттағы оқиғаға қатысты пікір білдірді. Мұнда бірнеше ұл бала бір қызды дәретханаға кіргізген. Оқиғаны ОКҚ-де өткен брифингте әкім айтып берді. Оның айтуынша, мекеме қызметкерлерінің ешқайсысы жұмыстан босатылмаған, деп хабарлайды Ulysmedia.kz.
ТОЛЫҒЫРАҚ
Мектептің бейнебақылау камерасына түсірілген видеодан бірнеше ұл баланың қызды дәретхана кабинкасына кіргізіп, ішінен құлыптағанын көруге болады. Қыз шалбарын тартуға тырысқан, ал айналасында басқа балалар жиналған. Оқиға биыл 5 сәуірде болған, бірақ мектеп-интернат басшылығы жағдайды жасырып, тиісті органдарға хабарламаған. Оқиға туралы ақпарат тек видео жарияланған соң белгілі болды.
Қарашөкеевтің айтуынша, бұл мектеп-интернат көпбалалы және аз қамтылған отбасылардан шыққан балаларға арналған. Әкімнің сөзіне қарағанда, тергеу балалардың әрекетінде зорлық белгілерін анықтамаған.
— Қылмыстық құрамның жоқтығына байланысты материал тоқтатылды. Жағдай 1–2 сынып оқушыларының ойын барысында болғаны анықталды, — деді әкім.
Оқиғаға қатысты балалардың ата-аналарымен профилактикалық әңгімелер жүргізілген, ал мектеп басшылары тәртіптік жауапкершілікке тартылған, бірақ жұмыстан шығарылмаған.
— Мектеп-интернаттағы жауапты қызметкерлерге тәртіптік шаралар қолданылды. Ешкім жұмыстан босатылған жоқ, — деді облыс әкімі.
Интернат директоры ақпаратты бермегені және еңбек тәртібін бұзғаны үшін қатаң ескерту алды. Сонымен қатар, Білім сапасын қамтамасыз ету департаменті директорға қатысты әкімшілік іс қозғау туралы ұсыныс әзірледі.
