Өңірлік полиция департаментінде жүргізілген тексерістің немен аяқталғаны белгілі болды. Тексеруге бұған дейін тараған анонимді ұжымдық арыз себеп болған. Онда ведомство басшысы мен оның орынбасарлары ұйымдасқан қылмыстық топ құрды деп айыпталған еді, деп хабарлайды Ulysmedia.kz.
ТОЛЫҒЫРАҚ
Lada.kz мәліметінше, анонимді хатта полиция департаментінің басшысы Сағындық Аяғанов пен оның орынбасарларына қатысты ұйымдасқан қылмыстық топ құрған деген мазмұндағы 15 тармақтан тұратын айыптаулар келтірілген.
Тексерістің ашықтығы мен объективтілігін қамтамасыз ету үшін әлеуметтік желілерде облыстық мәслихат депутаттарының, сондай-ақ қоғам өкілдерінің видеоүндеулері жарияланған.
ТЕКСЕРІС НӘТИЖЕСІ
Қазақстан Республикасы ІІМ комиссиясы жүргізген тексеріс нәтижесінде айтылған айыптаулардың бірде-бірі расталмаған.
Бұл мәселе бойынша Маңғыстау облыстық мәслихатының депутаттары Бердіғали Берекетов пен Киікбай Ешман, сондай-ақ Қазақстан халқы Ассамблеясы облыстық ақсақалдар кеңесінің төрағасы Онайбек Әбділов пен жергілікті қажылар қауымдастығының төрағасы Әбдірахман Қуанышбек жария түрде мәлімдеме жасады.
