Түркістан облысында мамандандырылған ауданаралық сот 71 жастағы ер адамға қатысты үкім шығарды. Ол 15 жастағы мектеп оқушысын зорлады деп айыпталған. 2025 жылдың қаңтарында қыз одан бала туған. Үкімді Ulysmedia.kz тілшісі онлайн форматта бақылап отырды.
Жәбірленуші зорлаушыдан бала туған
Сот ер адамды Қылмыстық кодекстің 120-бабы (16 жасқа толмаған кәмелетке толмағанды зорлау) және 149-бабы (тұрғын үйге заңсыз кіру) бойынша кінәлі деп таныды. Ол 15 жыл 6 ай мерзімге бас бостандығынан айырылып, жазасын орташа қауіпсіздік колониясында өтейтін болды.
Сондай-ақ сот оған өмір бойына педагогика саласында және кәмелетке толмағандармен байланысты кез келген мекемеде жұмыс істеуге тыйым салды. Жәбірленушінің жасы мен қылмыстың сипатына байланысты іс жабық режимде қаралды.
Ер адам қыздың туысы болып шыққан
Бұл оқиға 2025 жылдың күзінде-ақ қоғамда үлкен резонанс тудырған. Жаңалықтарда Түркістан облысы Келес ауданындағы ауылдардың бірінде 15 жастағы мектеп оқушысы 71 жастағы көршісінен бала туғаны туралы ақпарат тараған. БАҚ дерегінше, зейнеткер қызға туыстық жағынан нағашы ағасы болған.
Жүктілік туралы туыстары тек жетінші айында ғана білген. Бала 2025 жылдың қаңтарында Астанада дүниеге келген. Алайда қыздың анасы полицияға тек қазан айында, яғни босанғаннан кейін бірнеше ай өткен соң ғана арыз берген.
Балалар құқықтары жөніндегі уәкіл Динара Закиева сол кезде босанғаннан кейін дәрігерлер бұл ақпаратты Астана полициясына жолдағанын хабарлаған. Дерек тіркеліп, аумақтық тиесілігі бойынша Түркістан облысына берілген.
Іс қозғалыссыз қалған
Алайда Келес ауданында материал номенклатуралық іске жатқызылып, қозғалыссыз қалған. Бұл жағдай жария болғаннан кейін ғана ІІМ мен прокуратура тексеру бастаған. Жергілікті тұрғындар ер адамды ауылдан көшіруді талап еткен. Әлеуметтік желілерде адамдар жазасыздыққа наразылық білдіріп, іс неге тек қоғамдық шу шыққаннан кейін ғана қозғалғанын сұраған.
Бүгін сот бұл іске нүкте қойды. Сотталған адамның жасын ескерсек, 15,5 жыл түрме жазасы ол үшін іс жүзінде өмір бойына тең жаза болып отыр.
