Бүгінгі таңда қор 177 млрд теңгеге қайырымдылық жобаларын іске асырумен айналысып жатыр деп хабарлайды Ulysmedia.kz.
Екі жылда қанша қаржы жұмсалды?
"Қазақстан халқына" қоғамдық қорының басқарма басшысы Болат Жәмішев екі жыл ішінде 90 млрд теңгеге қайырымдылық көмек көрсетілгенін хабарлады.
"Қорға 196 млрд теңге түсті. Оның ішінде 2 жыл ішінде қор 90,9 млрд теңгеге қайырымдылық көмек көрсетті. Бүгінгі таңда шығындар 90 млрд теңгені құрады, бірақ іске асыратын жобалардың барлығына 177 млрд теңге жұмсалады", - деді ол.
Кімдер ақша аударды?
"Жиі қойылатын сұрақ. Қайырымдылық жасайтын кімдер? 196 млрд теңгенің 131 млрд-ын 660 компания (ЖШС, АҚ, қорлар) аударды. Негізгі сома қазақстандық кәсіпорындардан түсті. «Самұрық-Қазынадан» 20 млрд теңге. Есепте түсімдердің барлық сомасы көрсетіледі. 39 млрд теңге жеке тұлғалардан келіп түсті. Қарапайым адамдар да аздап жіберіп жатады. Күні бұрын 500 млн үш компаниядан түсті, негізгі қызмет түрі – құрылыс. Олар өздерін атауды, жарнамаламауды өтінді. Балалар мен жастарға протез жасау жобасын іске асыру үшін бағыттаған. Астана әуежайында чемодандары ораумен айналысатын компания қызметкерлері ай сайын 500 мың теңгеден аударып отырады. Сонымен қатар, ұлттық лотерея операторы 2023 жылы қорға 4,9 млрд теңге жіберді", - деді Жәмішев.
Қор туралы
2022 жылғы 11 қаңтарда Президент Тоқаев денсаулық сақтау, білім беру және әлеуметтік қолдау саласындағы проблемаларды шешу үшін "Қазақстан халқына" қоғамдық әлеуметтік қорын құруды тапсырды. Бұл Қантар оқиғасынан кейін қолға алынды.
