Ұлттық статистика бюросы Қазақстан ажырасу бойынша әлемде екінші орында тұрғаны туралы ақпарат шындыққа жанаспайтынын мәлімдеді, деп хабарлайды Ulysmedia.kz.
Ажырасу коэффициенті 4.6 тең Қазақстан Мальдив аралдарынан кейін екінші орында тұрғаны туралы ақпарат шындыққа сәйкес келмейді. Бұл жалған деректің негізгі көзі worldpopulationreview.com сайтындағы мақала болған, - делінген хабарламада.
Бюро дерегінше, 2022 жылдың қорытындысы бойынша елімізде ажырасу коэффициенті 1000 адамға шаққанда 2,27 болған.
2020, 2021 жылдармен салыстырғанда коэффициенттің төмендеуі байқалады – тиісінше 2,56 және 2,54. 2023 жылдың қорытынды деректері алдағы сәуір айында жарияланады, - делінген хабарламада.
Бюро мақала авторларына әлемдік ресурста қате берілген деректер бойынша хат жолдағандарын айтты.
Сондай-ақ Бюро ресми дереккөздерге сілтеме жасауды және таратылатын деректерді алдын ала тексеріп отыруды ескертеді.
Еске салсақ, Қазақстан ерлі-зайыптылардың ажырасуы бойынша көш бастағанын, көрсеткіш жыл басында 1000 адамға шаққанда 4,6-ны құрағанын Ranking.kz сайтына сілтеме жасап жариялаған болатынбыз.
