Жыл басынан бергі екі тоқсанның қорытындысы бойынша 1 млн қазақстандық ең төменгі күнкөріс деңгейі шамасындағы табысқа күнелткен. Бұл халықтың 5,1 %, деп хабарлайды Ulysmedia.kz.
СТАТИСТИКА БЮРОСЫ НЕ ДЕЙДІ?
Кедейліктің ең жоғары шегі Түркістан облысында – 188,5 мың. Бұл – облыс тұрғындарының 8,8%-ы. Ары қарай кедейлік жоғары өңірлер қатарында Жетісу – 7,8% ( 54,2 мың), Абай – 7,7% (46,5 мың) облыстары тұр.
Кедейліктің ең төменгі көрсеткіші Қарағанды және Атырау облысында тіркеліп отыр. Ол жерлерде көрсеткіш пайыздық шамада 3-ке тең немесе халықтың сәйкесінше, 33,6 мың, 21,4 мың адамы кедей тұрмыс кешеді.
Мұнан кейінгі сатыда 3,3%-бен Астана жайғасқан. Елорда тұрғындарының 48,4 мыңы кедейлік шегінде өмір сүреді. Бұл – республика бойынша тәуір көрсеткіш болғанымен, жағдай бір жыл бұрынғыға қарағанда едәуір нашарлап, кедейлік шегі 37,3%-ға артқан.
ҚАЙ САНАТТА КЕДЕЙЛІК КӨП
Бюро мәліметінше, кедейлік шегіндегі 1 млн адамның 889,8 мыңы 5 адамнан тұратын отбасылардың мүшесі. Ал 86,5 мыңы төрт адамдық жанұяларда, 35,6 мыңы үш адамдық, 14,6 мыңы екі адамдық отбасында тұрады. Жалғыз адамнан тұратын кедейлік шегіндегі санатқа 1,4 мың тұлға кіреді.
