Біздің қоғамға "суррогат ана" деген ұғым сіңісе бастады. Бұрын үрке қарайтындар көп еді, қазір үмітпен қарайтындар көп. Жатырын жалға беретін құрсақ аналар мұндай қадамға қиындыққа тап болғандықтан баратын көрінеді. Өзінің қаржылық жағдайын реттеп қана қоймай, бала көтере алмай жүрген әйелге шаттық сыйлайды. Бұл бизнесте қазақ қыздары аз емес, деп жазады Ulysmedia.kz "Азаттық" радиосына сілтеме жасап.
Еріккеннің ермегі емес
Ресей мен Украина арасындағы соғыс суррогат ана нарығының Орталық Азияға ауысуына алып келді. Бүгінде Грузияға Қазақстан, Қырғызстан және Өзбекстаннан келген жүздеген әйелдер эмбрион отырғызу процедурасынан өтіп, өзге отбасыларға бала сыйлауға ниеттеніп отыр.
Олардың көбі – жалғызбасты аналар. Әрқайсысының үйінде 2-3 баласы бар.
Мәселен, 31 жастағы қырғыз қызы қытайлық отбасыға егіз туып берген. Бұл қызметі үшін 20 мың долларға жуық қаражат алған.
“ Үш баланы жалғыз асырап отырмын. Үй салып жатырмын. Қарыздарым, несиелерім көп”, – дейді ол.
Шетел жоғары бағалайды
“Sur312kg” агенттігінің өкілі Людмила Волчкованың айтуынша, Ресей өзге ұлт өкілдерінің суррогат ана болуын шектеп тастаған. Бүгінде агенттікке Грузия және Армениядан ұсыныс көп түседі екен. Айтпақшы, Грузия 1997 жылы бұл “қызметті” заңмен реттеп қойған.
“ Суррогат аналар бізді интернеттегі жарнама арқылы табады. Көбіне Қазақстан және Қырғызстаннан хабарласатындар көп. Алдағы уақытта Грузия ұлт өкілдерінің суррогат ана болуына шектеу қояды деген сыбыс бар. Бұл, әрине, суррогат аналарға қиынға соғатыны анық. Табысынан айырылады. Мәселен, қазақстандық бір әйел үшінші рет суррогат ана атанайын деп отыр”, – дейді ол.
Жалпы, шетелде суррогат аналардың қызметі қымбат бағаланады. Сондықтан шетелге барып, осы қызмет түрін көрсететін қазақстандықтар көп екен. Шетелде суррогат ананың құқығы да жақсы қорғалатын көрінеді.
Еліміздегі заң
Елімізде әрбір алтыншы отбасы бір перзентке зар болып отыр. 14 мыңнан аса ерлі-зайыптының табиғи жолмен балалы болуға мүмкіндігі жоқ.
Біздің елімізде суррогат ана болуға заңмен тыйым салынбаған. «Неке және отбасы туралы» заңда суррогат ананың қандай ұғым екені, оған қойылатын талаптар мен шарттар жан-жақты көрсетілген. Бұл заңның «Суррогат ана болу және қосалқы репродуктивтік әдістер мен технологияларды қолдану» деп аталатын және алты баптан тұратын 9-тарауында тараптардың құқықтары мен міндеттері толық қамтылған. Онда суррогат ананың жасы мен денсаулығы көрсетілген. «Құрсақ» ана мен тапсырыс беруші осы заңнама негізінде келісімшарт жасайтынын атап өткен жөн.
