Алматы полиция департаменті қарақалпақ белсендісі Ақылбек Мұратовтың ұсталғанын растады, деп хабарлайды Ulysmedia.kz.
Полициядан хабар
– Алматы полициясының қызметкерлері халықаралық іздеуде жүрген Өзбекстан азаматы Ақылбек Мұратовты ұстап, уақытша ұстау изоляторына орналастырды. Құқықтық көмек және құқықтық қатынастар туралы Минск конвенциясының талаптарына сәйкес, Өзбекстан полициясы іздеп жүрген Ақылбек Мұратовты экстрадициялау туралы мәселені қазір Қазақстанның бас прокуратурасы шешеді", - деп хабарлады Алматы ПД баспасөз хатшысы Салтанат Әзірбек.
ІІМ қызметкерлері Өзбекстан билігінің өтініші бойынша қарақалпақ белсендісі Ақылбек Мұратовты ұстаған болатын. 15 ақпанда сағат 21:50-де ішкі істер министрлігінің екі қызметкері Ақылбек Мұратовты үйінен алып кеткен. Кейінірек ол бірге жүрген бойжеткеніне қоңырау шалып, ұсталғанын хабарлаған. Мұратов Алматы ІІД-де. Айтуынша, оны ұстауға қарақалпақстандық Мұхамедин Оразбайұлы Баймұрзаев қатысқан. Белсендіге қылмыстық кодекстің 244-бабы 1-тармағы (қоғамдық қауіпсіздік пен қоғамдық тәртіпке қатер төндіретін материалдарды дайындау, сақтау, тарату немесе көрсету) айып тағылған.
Қазақстанда қарақалпақ белсенділерінің қамауға алынуы
Өзбекстан билігінің өтініші бойынша Қарақалпақстаннан келген бес белсенді Қазақстанда 12 ай бойы экстрадициялық қамауда болды. Қазақстан билігі саяси баспана беру туралы өтініштерін қабылдамады.
2024 жылдың 9 қаңтарында Маңғыстау облысындағы қарақалпақ диаспорасының басшысы Ниетбай Оразбаев Алматы ауруханасында қайтыс болды. 2023 жылдың мамырында ол Өзбекстанда сырттай 12 жылға бас бостандығынан айырылды. Оразбаев "билікті басып алу жөніндегі қастандыққа", "жаппай тәртіпсіздіктерді ұйымдастыруға", сондай-ақ "қоғамдық қауіпсіздік пен тәртіпке қауіп төндіретін материалдар жасау" баптары бойынша Өзбекстанда кінәлі деп танылған. 2023 жылдың желтоқсанында Оразбаевтың Қазақстан азаматтығынан айырылғаны белгілі болды.
Қарақалпақстандағы наразылықтар
2022 жылдың шілде айының басында Нүкіс, Мойнақ және басқа қалаларда Қарақалпақстанның егемендік мәртебесін жоятын конституциялық түзетулерге қарсы наразылықтар болған еді.
Бірақ билік демонстрацияларды билікті басып алу әрекеті ретінде қарастырып, акцияларға қатысушыларға көзден жас ағызатын газ, резеңке оқтар мен түтін бомбаларын қолданған.
Ресми мәліметтерге сәйкес, наразылық білдірушілерді тарату кезінде 21 адам қаза тауып, 243 адам жарақат алған.
