Колумбияда 3 жастан 11 жас аралығындағы балаларды коронавирусқа қарсы вакцинациялау бағдарламасы жүзеге аса бастады, деп хабарлайды ulysmedia.kz.
rg.ru-дің мәліметінше, бұл туралы Оңтүстік Америка Республикасының президенті Иван Дуке мәлімдеді.
«31 қазаннан бастап 3-11 жас аралығындағы қыздар мен ұлдарға вакцина сала бастаймыз», - деп жазды ол Twitter парақшасына.
Президент балаларға қытайлық Sinovac вакцинасы қолданылатынын атап өтті.
Бұл вакцинаны балалардың ішінде алғаш болып Колумбияның Денсаулық сақтау министрі Фернандо Руистің қызы Лусиана Руис салдырды. 8 жастағы қыз ауруханаға ата-анасымен бірге келді.
«Вакцина салған кезде ауырмайды. Барлық ұлдар мен қыздарды вакцина салдыруға шақырамын», - деді ол.
Соңғы мәлімет бойынша, Колумбияда 5 млн адам коронавируспен ауырған. 127 281 жағдай өліммен аяқталса, 4 845 554 адам толық сауығып кеткен.
