Қарағандыда жаппай жол апатынан қаза тапқан Ерлан Алдоңғаровтың әйелі Дана Алдоңғарова президент Қасым-Жомарт Тоқаевқа жүгінді. Ол мемлекет басшысының тергеуге назар аударуын сұрайды, себебі оның шынайылығына күмәнмен қарайды, деп хабарлайды Ulysmedia.kz.
Дана Алдоңғарованың айтуынша, апатқа кінәлі - "Қазполимер" және "Қазгидромаш" иесі Камаев Сергей Васильевич. 2 қыркүйекте апат болған күні 40 км/сағ шектелген учаскеде ол жылдамдықты сағатына 120 шақырымға дейін арттырған.
– Жаңалықтардан мен Ерланнан басқа апаттан тағы үш адам зардап шеккенін білдім - олар қазір ауруханаларда ауыр жағдайда жатыр. БАҚ-тан Камаевтың созылмалы ауруы бар, Ауған соғысының ардагері екенін айтқанын оқыдым, бірақ апат болған кезде ол рөлге өз еркімен отырған. Сол күні Ерлан мен басқа да адамдар оның көлік жүргізу шешімінің құрбаны болды, – дейді марқұмның әйелі.
Туыстары ақтауға тырысқан
Дана Алдоңғарова сонымен бірге Камаевтың туыстары марқұмды жерлеу кезінде келгенін айтады.
– Көңіл айту сылтауымен олар кінәліні ақтай бастады және бейтаныс адам арқылы батаға 50 мың теңге қалдырды, біз оларды құқық қорғау органдары арқылы міндетті түрде қайтарамыз. Осы әрекеттермен олар Камаевтың беделін ақтауға және жұртшылықтың көз алдында аяушылық туғызғысы келеді, - деп атап өтті ол.
Балалар әкесіз қалды
Әйел марқұм екеуі жас отбасы болғанын, олардың үш баласы қалғанын айтады. Жерлеуді ұйымдастыруда оларға туыстары, достары, әріптестері, жанашыр адамдар да көмектескен.
– Ол небәрі 40 жаста еді. Мен түсінемін, Ерлан енді қайтару мүмкін емес. Біздің отбасымызға қамқорлық жүгі енді маған жүктелді. Бірақ менің жалғыз үмітім - Камаевқа әділ жаза берілуі керек. Сізден бұл істің барысын назардан тыс қалдырмауыңызды сұраймын. Сіздің назарыңызбен сот тергеу нәтижелері бойынша әділ шешім шығаратынына сенімдіміз. Шынында да, Сергей Камаевтың шешімдері мен әрекеттері салдарынан менің жұбайым, балаларымыздың әкесі, қарт ата-аналардың ұлы жан тәлісім етті. Сондай-ақ, бұл апаттан басқа адамдар да зардап шекті! Осы қиын кезеңде бізді қолдауыңызды сұраймын, - деді қаза тапқан қарағандылықтың әйелі.
Еске сала кетейік, апат 2 қыркүйекте Аманжолов көшесінде сағат 14:15 шамасында болған. Онда алты көлік соқтығысқан. Соның салдарынан бір адам жарақат алып көз жұмды, үшеуі медициналық мекемеге жатқызылды.
Сондай-ақ, Қарағандыда бұл оқиғаға белгілі кәсіпкер Сергей Камаев кінәлі екені белгілі болды, ол сотта апат кезінде есінен танып қалдым деп мәлімдеді.. Ал қаза тапқан Ерлан Алдоңғаров әкімдік қызметкері болған.
