Қосшы қаласының соты кәсіби міндеттерін тиісінше орындамағандықтан абайсызда адам денсаулығына ауыр зиян келтіруге әкеп соққан үшін "103" пультінде шақыртулар қабылдайтын фельдшерге қатысты қылмыстық істі қарады, деп хабарлайды Ulysmedia.kz.
Сотта хабарланғандай, "103" қызметінің диспетчері артериялық гипертензиямен есепте тұрған пациенттен кеудедегі ауырсынуға шағымданған өтінішті қабылдаған. Шақыру жеделдіктің бірінші санаты бойынша қабылданып, Қосшы қаласына қайта бағытталды.
"Қосшыда сотталушы фельдшер С бұл шақыруды өңдей отырып, оны бірінші санаттан төртінші санатқа ауыстырды, пациенттің шағымын бұрмалап, "жоғары температура, бір аптадан астам ауырады, қатты жөтел" деп көрсетіп, емханаға жібереді. Кейін науқасқа емханадан фельдшер жіберілді. Фельдшер А. науқасты тексеріп, инъекция жасап, төртінші санат бойынша медициналық көмек көрсетеді. Науқас медициналық көмек алу үшін Астана қаласының ауруханасына өз бетінше баруға мәжбүр болады. Ауруханада оған "жүректің ишемиялық ауруы, миокард инфарктісі, стенттеу, кардиогендік шок, клиникалық өлімнен кейінгі жағдай" диагнозы қойылды", - делінген Ақмола облысы сотының ақпаратында.
Сотта атап өткендей, сотталушы С. кінәсі сараптамалардың қорытындыларымен, жәбірленушінің, куәгерлердің айғақтарымен, фельдшерге шақыруларды қабылдау бойынша шақырудың жеделдігі санатын өзгертуге тыйым салатын нормативтік құқықтық актілермен және істің басқа материалдарымен расталды.
"Жаза тағайындау кезінде сот абайсызда жасалған ауырлығы аз қылмысты, жеңілдететін мән - жай ретінде сотталушының жүктілігін, ауырлататын мән-жайлардың жоқтығын, оның бұрын сотталмағанын назарға алды. Сот үкімімен фельдшер С. - ға медициналық қызмет көрсету құқығынан айыра отырып, пробациялық бақылау белгіленіп, 1 жыл 6 айға бас бостандығын шектеу тағайындалды", - делінген сот шешімінде.
Сот Ақмола облысының Денсаулық сақтау басқармасына жеке қаулы шығарды, ол жедел медициналық жәрдем қызметкерлерінің медицина саласындағы нормативтік құқықтық актілерді өрескел бұзуына назар аударды, бұл абайсызда науқастың денсаулығына ауыр зиян келтірді.
Сот үкімді облыстық жедел медициналық жәрдем станциясы, "Ақмол" қосалқы станциясы және Қосшы қаласының емханасы қызметкерлерінің қатысуымен өткізді. Үкім заңды күшіне енген жоқ.
