Астанада мейрамханалар мен дәмханаларда келушілерге қызмет көрсету үшін 10% төлем алу тәжірибесінің заңдылығы, сондай-ақ депозиттік жүйе мәселелері талқыланды, деп хабарлайды Ulysmedia.kz.
САУДА ЖӘНЕ ИНТЕГРАЦИЯ МИНИСТРІНІҢ УӘЖІ
Сауда және интеграция министрі Арман Шаққалиев Қазақстанның Азаматтық кодексіне сәйкес, қоғамдық тамақтану саласында ас мәзірін ұсыну жария оферта болып табылатынын, сондықтан қызмет көрсету үшін ақы төлеу қажеттілігі туралы ақпарат мәзірде көрсетілуі тиіс екенін еске салды. Егер мұндай ақпарат болмаса, төлемақы алу заңсыз деп есептеледі.
Келушілерден заңсыз төлемдер алуды болдырмау үшін Ішкі сауда ережесіне өзгерістер енгізілді. Енді мейрамханалар қызмет көрсету ақысын тек мәзірде көрсетілген жағдайда ғана ала алады. Сондай-ақ «депозиттік жүйеге» тыйым салу ережелері айтылды, яғни мекемеге кіру тегін болып қалады, бірақ VIP-кабина, караоке кабиналар секілді қосымша қызметтер үшін төлем алуға болады, – делінген хабарламада.
Кездесу барысында Арман Шаққалиев кәсіпкерлерге қызмет көрсету ақысының ережелерін нақтылау мәселесін талқылауды ұсынды, әсіресе, бұл төлемнің тамақ бағасына қосылғаны жөнінде. Қоғамдық тамақтандырудың өзін-өзі реттейтін ұйымының төрайымы Вероника Нұрпейісованың айтуынша, енді қоғамдық оферта ережелеріне сәйкес, мейрамханалар мен дәмханалар қызмет көрсету үшін алынатын төлем туралы келушілерді мекемеге кірген кезде хабардар етеді.
«ДЕПОЗИТ АЛУҒА ҚҰҚЫҒЫМЫЗ БАР»
Депозиттерге қатысты айтар болсақ, VIP-кабиналар мен караоке-кабиналарға депозит алуға құқығымыз бар. Нарықтағы ережелер барлық ойыншылар үшін бірдей болуы тиіс: не бәрі 10% алады, не алмайды. Барлық қатысушылар үшін бірыңғай ережелерді анықтау қажет. Егер мекеме қызмет көрсету үшін 10% алмаса және бұл туралы жария оферта ретінде көрсетпесе, онда ол дұрыс жұмыс істемейді, – деп түсіндірді Вероника Нұрпейісова.
Сонымен қатар ол: «Егер кәсіпкерлер қызмет көрсету үшін 10% алып тастаса және стейктің бағасы мысалы, 5500 теңге болса, ал көрші мекемеде 5000 теңге болса, шын мәнінде баға бірдей болып қалады. Бұл жағдайда даяшы шайпұл талап ете алмайды», – деп атап өтті.
МИНИСТР ШАҚҚАЛИЕВ НЕ ДЕП ЕДІ
Бұған дейін дәмханаларда қызмет үшін төленетін 10% ақы алынып тасталатыны айтылған болатын.
Біз қызметтер мен пайыздарға байланысты сұрақты білеміз. Заңнаманы мұқият зерттедік. Егер мекеменің кіреберісінде қызмет көрсету шарттары жазылған жария парақ болса, егер сіз оны оқып, кірсеңіз – демек шарттарға келісім бергеніңіз. Мен осы мәселеге байлансты жеке ұстанымымды айтайын. Қазір ішкі сауда ережелеріне өзгерістер дайындап жатырмыз. Егер сізге қызмет көрсетілсе, қосымша ақы алынбауы керек деп санаймыз. Біз осындай ережелерді талқылаймыз. Әрине, бизнес өкілдерінің бәрі мұны қолдауға дайын емес, бірақ біз бұл ережені дайындаймыз. Қызмет үшін алынатын ақшаны, депозиттерді, жарналарды төлеуге қатысты да. Бүгінгі жағдайда, егер сізге қызмет көрсеткісі келсе, сізді шарттармен таныстыруы керек, - деген еді министр.
