Түркия президенті Режеп Тайып Ердоған Түркия Украина бойынша бейбіт конференцияға қатысуға дайын екенін мәлімдеді, деп хабарлайды Ulysmedia.kz.
ЕРДОҒАН МӘЛІМДЕМЕСІ
Ердоған бұл туралы АҚШ-қа сапары аясында Нью-Йорктегі түрік үйінде журналистермен кездесу кезінде айтты.
"Біз осындай конференцияға қатысуға дайын екенімізді айттық. Сыртқы істер министріміз Хакан Фидан мен барлау қызметтері Украина тарапымен байланыста болады. Түркия аймақта бейбітшілік орнатуға әкелетін процестің бір бөлігі болуға ұмтылуда", – деді ол.
Президент сонымен қатар Түркия бейбітшілікті орнатуға ең мүдделі елдердің бірі екенін атап өтті.
ТҮРКИЯНЫҢ НАТОДАҒЫ МАҢЫЗЫ
Әңгімелесу барысында түрік көшбасшысы НАТО-ның бұрынғы Бас хатшысы Йенс Столтенбергтің сөздеріне түсініктеме берді, ол Түркия болмаса Еуропаның қауіпсіздігі мүмкін емес деп мәлімдеді. Ердоған Столтенбергке қолдау көрсеткені үшін ризашылығын білдіріп, Түркияның альянстағы маңызды рөлін атап өтті.
"Мен Столтенбергтің жұмысын жоғары бағалаймын. Ол әрқашан Түркиямен тығыз қарым-қатынаста болды және ешқашан теріс көзқарасты білдірмеді. Енді НАТО-ның жаңа Бас хатшысы Марк Рюттемен қарым-қатынас қалай дамитынын көрейік", – деді президент.
Ердоған сонымен қатар Түркия НАТО-ның сенімді одақтасы болып қала беретінін және әрқашан альянстағы міндеттемелерін орындайтынын еске салды.
"Еуропа Түркияның НАТО үшін қаншалықты маңызды екенін біледі, бірақ кейде оның рөлін бағаламайды", – деп қосты ол.
Естеріңізге сала кетейік, бұған дейін Столтенберг Украина Солтүстік Атлантикалық альянсқа кірмейінше, елде бейбітшілік болмайды деп айтқан.
