Ресей әскері Херсонға төрт басқарылатын авиациялық бомба тастады, соның салдарынан кемінде 20 адам жараланды, оның ішінде екі кішкентай бала бар. Славянск қаласына жасалған шабуыл кезінде бір адам қаза тапты, деп хабарлайды Ulysmedia.kz.
КЕМІНДЕ 20 АДАМ ЖАРАЛАНДЫ
Ресейдің Херсонға жасаған әуе соққысы нәтижесінде кемінде 20 адам жараланды. Жарақат алғандардың арасында екі жастағы ұл бала мен төрт жастағы қыз бала бар, деп хабарлады 7 қазанда қала әскери әкімшілігінің басшысы Роман Мрочко.
МЕКТЕП ҚИРАДЫ
Сондай-ақ, 32 мен 76 жас аралығындағы 9 әйел мен 9 ер адам жараланды. Өз кезегінде Херсон облысы әскери әкімшілігінің басшысы Александр Прокудин бұрын қираған мектепке және облыс орталығының орталық ауданындағы тұрғын үй құрылысына соққы жасалғанын айтты.
Украина Ішкі істер министрлігі екі бомба «Тавриялық» шағын ауданында жарылғанын, тағы екеуі Херсонның Орталық ауданының жағалау кварталдарында болғанын хабарлады.
“Мектеп ғимараты іс жүзінде жойылды, балабақшаға және кем дегенде 14 көпқабатты үйге, сондай-ақ бес көлікке зақым келді” делінген хабарламада.
СЛАВЯНСКІНІ АТҚЫЛАУ
Ресей әскері соғыс қимылдарын жалғастырып, Донецк облысындағы Славянск қаласын атқылады. Соның салдарынан бір адам қаза тауып, тағы бесеуі жарақат алды, олардың арасында екі бала бар, деп хабарлады Донецк облысының әскери әкімшілігінің басшысы Вадим Филашкин. Сонымен қатар, алты көпқабатты үй, кәсіпорын, әкімшілік ғимарат және екі көлік зақымданғаны айтылды.
