Әлемге әйгілі әнші Димаш Құдайбергеннің «When I’ve Got You» әні тоғыз Match FM радиостанциясы арқылы бүкіл Мексикада бір уақытта таратылған Conteomatch бағдарламасында ұсынылды, деп хабарлайды Ulysmedia.kz.
Бұл туралы dimashnews.com сайты жазды.
Композиция Пуэрто-Вальярта (98,5 FM), Пуэбла (90,1 FM), Гвадалахара (90,3 FM), Морелия (93,9 FM), Леон (97,5 FM), Керетаро (97,9 FM), Кульякан (100,1 FM) және Мехико (99.3 FM) сияқты қалаларда орындалған. Осылайша, ән қалың тыңдарманға жол тартып, жанкүйерлерге сүйікті өнерпазының шығармашылығынан ләззат алуға мүмкіндік берді.
Acir тобы мен халықаралық iheartradio желісінің бөлігі болып саналатын Match FM радиосы Мексикада да, шетелде де өз толқындарында таратылатын әндер мен бағдарламаларды насихаттайды.
Мексикалық Dears биылғы жылдың тамыз айында олармен кездесу ұйымдастырып, Димашты кең аудиторияға таныстыруға мүмкіндік берген Мехикодағы Match 99.3 FM радиостанциясына ерекше алғысын білдірген.
Жанкүйерлерімен тығыз байланыста болған жүргізуші Джари оларды құшақ жая қарсы алып қана қоймай, тыңдармандардың әртіспен жақынырақ танысуына жағдай жасаған.
Сондай-ақ Джари қазақстандық әншінің шығармашылығын таныту мақсатында TikTok желісінде тікелей эфир де жүргізген.
Еске салсақ, бұған дейін Димаш Құдайбергеннің елші болып тағайындалғанын жазған болатынбыз.
