Wildberries танымал маркетпелейсінің негізін қалаушы Татьяна Кимнің өмірбаяны, сауда нарығындағы ірі ойыншының қалыптасуы туралы Ulysmedia.kz материалында.
КИМ ДЕГЕН КІМ?
Татьяна Ким (2003-2024 ж. – Бакальчук) 1975 жылы 16 қазанда Грозный қаласында (Шешен-Ингуш АКСР) дүниеге келген, Газопроводск ауылында (Мәскеу облысы) мектепті бітірген. Әкесі инженер, анасы бастауыш сынып мұғалімі болып жұмыс істеген.
АУДАРМАШЫ БОЛЫП БАСТАҒАН
Татьяна Ким отбасының тұңғышы, інісі мен сіңлісі бар. 1992 жылы Коломнадағы Мәскеу мемлекеттік аймақтық әлеуметтік-гуманитарлық институтының шет тілдері факультетіне оқуға түскен. Институтты бітіргеннен кейін бір жыл университетте ағылшын тілінен сабақ береді, содан кейін екінші жоғары білім алу үшін Мәскеуге көшеді. Ол дизайнерлік оқуды оқыды, бірақ көп ұзамай оқуын тастап кетті. 2000 жылдары Татьяна шағын баспада аудармашы болып жұмыс істеді.
КИМНІҢ БАКАЛЬЧУККЕ АЙНАЛУЫ
Сол кезде Татьяна Ким өзінің болашақ күйеуі Владислав Бакальчукпен кездесті. Олар бір жарым айдан кейін шаңырақ көтерді. Татьяна күйеуінің фамилиясына өтті. Радиофизик болып жұмыс істейтін күйеуі Владислав желі тартумен айналысып, кейін компьютерлер сатты.
Отбасының тұңғышы 2004 жылы дүниеге келді. Қаржылық қиындықтарға байланысты, Татьяна интернетте киім сатуды қолға алды. Оған осындай бизнес-модельді таңдауына дүкен аралап, уақыт жоғалтқысы келмейтіндігі әсер еткен. Осылайша ол Otto және Quelle каталогтары арқылы киім сата бастады, бұл үшін Wildberries компаниясын және сонымен аттас веб-сайтты құрып, оның бас директоры болды. Ол веб-сайтта тауарлардың фотосуреттері мен сипаттамаларын орналастырды, өтінімді алғаннан кейін ол Германиядан тапсырыс беріп, сәлемдемелерді өзі күтіп алып, тұтынушыларға жеткізді.
WILDBERRIES БАСТАУЫ
Компания клиенттен тапсырыс үшін алдын ала төлем талап етпейтін, тек тапсырыс сомасының 10% мөлшерінде комиссия алады. Бұл Мәскеудегі өзге бизнесмендерге қарағанда барынша арзан болды. Өйткені олар әр тапсырысқа 10 пайыз емес, 15 пайыз қосатын және Мәскеуден алыс аймақтар үшін оның құны арта беретін. Ал Татьяна елдің орталығындағы және шет аймақтардағы сатып алушы шығындарының бағасы әртүрлі болмауы керек деп шешті.
Уақыт өте келе ол компанияға жұмыс істеуге туыстары мен таныстарын тарта бастады, содан кейін курьерлерді және қолдау операторларын жалдады. 2009 жылы Wildberries тапсырыстардың толық орындалуын қамтамасыз ету үшін тікелей еуропалық брендтердің дистрибьюторларынан тауарларды сатып ала бастады. 2012 жылы Wildberries веб-сайтында 1000-нан астам киім мен аяқ киім бренді сатылды. Интернет-дүкен сонымен қатар киімге арналған фотосессияларды өз бетінше жүргізе бастады және Мәскеу облысында қоймасы бар кеңсені жалға алды.
Тапсырыстар саны үлкен қарқынмен өсті, бұрынғы қойма жеткіліксіз болды, алдымен Апаринкиде, содан кейін Подольскіде үлкенірек қоймалар сатып алынды. 2017 жылы компания бұл бизнес-модельдің тиімдірек және перспективалы екенін ескере отырып, Колединода өзінің қойма кешенін салу туралы шешім қабылдады.
ОНЛАЙН САУДА ОРТАЛЫҚТАРЫНЫҢ ПАЙДА БОЛУЫ
2018 жылы Татьяна жергілікті өндірушілер арасында онлайн платформалардағы сауданы танымал ету үшін онлайн сауда орталықтарын (OTC) құру идеясын ұсынды. Бастапқыда шағын сервистік орталық пен кәсіпкерлерді оқытатын орны бар, ауданы шамамен 5000 шаршы метр болатын үй-жайларды ұйымдастыру жоспарланған. Бірақ ол бірнеше облысты аралап, губернаторларымен кездескеннен кейін өңірлерге толыққанды қойма кешендері керек деген шешімге келеді. Осындай толық циклді логистикалық орталықты бірінші болып Татарстанда салуға келісті, содан кейін бүкіл Ресейде құрылыс басталды. Компания Ресейдің 50 аймағында және 4 шет мемлекетте өзінің логистикалық инфрақұрылымын басқарып отыр. Жеке қоймалардың жалпы ауданы 2 миллион шаршы метрден асты, логистикалық нысандардың саны 80-нен астам, ал жұмыс орындарының саны жүздеген мыңды құрайды. Осының арқасында компания ірі салық төлеушілердің бірі болып отыр.
WILDBERRIES КОМПАНИЯСЫНЫҢ ШАРЫҚТАУЫ
2011 жылы компания төлем жасамас бұрын киімді киіп көру туралы клиенттер өтініші бар екенін анықтады. Ол кезде Ресейде тек курьерлік жеткізу қызметі ғана болған. Нәтижесінде кез келген ыңғайлы уақытта келіп, тапсырыс беруге болатын, шағын бөлмелері бар орталықтар ашылды. Тапсырысты қабылдау нүктелері ресейлік онлайн коммерция нарығында алғаш рет осылай пайда болды.
2015 жылы Wildberries маркетплейстер арасында бірінші болып толыққанды қабылдау пункті желісін іске қосты. 2020 жылдың тамыз айында компания кәсіпкерлерге жеткізуші серіктес форматын ұсынды. Бүгінгі таңда жеткізу пункттері Ресейді және басқа елдерді қоса алғанда 50 000 нүктеден асады.
2020 жылы Wildberries коронавирустық пандемияға байланысты толығымен қолма-қол ақшасыз төлем әдістеріне көшті.
2021 жылдың ақпанында Татьяна Заңды тұлғалардың бірыңғай мемлекеттік тізілімінде көрсетілгендей Standard Credit Bank-тің 100% акциясының иесі болды. Компания өкілінің айтуынша, банк «сатып алушылар мен кәсіпкерлерге арналған қолданыстағы қызметтерді одан әрі дамыту және жаңаларын іске қосу үшін» қажет. Сол жылдың тамыз айында банк Wildberry Bank деп өзгертілді.
2022 жылы Wildberries ААҚ кірісі 317 миллиард рубльді құрады, ал таза пайда 10 миллиард рубльден асты. Тауарлар мен қызметтерді сатудың жалпы айналымы 98%-ға өсіп, 1,67 триллион рубльге жетті. 2023 жылы тауар айналымы 2,5 триллион рубльді құрады, ал кіріс 70 пайызға дерлік өсіп, 538,7 миллиард рубльге жетті. Wildberries таза табысы 18,9 миллиард рубльді құрады. 2024 жылдың қыркүйегіндегі жағдай бойынша Wildberries тұтынушыларға күн сайын 15 миллионнан астам тауар жібереді.
ӘЛЕМНІҢ АЛТЫ ЕЛІНДЕ ЖҰМЫС ІСТЕЙДІ
Компания алты елде – Ресей, Беларусь, Армения, Өзбекстан, Қазақстан, Қырғызстанда жұмыс істейді, сонымен қатар Қытаймен жұмыс істеуді қолға алып жатыр.
Нарық алаңынан басқа, соңғы бірнеше жылда Татьяна Wildberries экожүйесін құрайтын бірқатар қызметтерді іске қосты: WB Travel – тәжірибелер мен туристік қызметтер нарығы; «WB Digital» – электронды контентті сатуға арналған сайт; «WB Guru» – бұл өнім шолулары бар сайт.
2023 жылы Татьянаның жетекшілігімен Ресейде және басқа елдерде вебинарлар мен оффлайн семинарлар форматын біріктіретін PROWB кәсіпкерлік мектебі ашылды.
2024 жылдың маусымында Wildberries негізін қалаушы Татьяна Ким цифрлық сауда платформасын жасау үшін Russ Group-пен бірігетінін жариялады. Шілде айында олар «РВБ» жауапкершілігі шектеулі серіктестігін тіркеді.
БАКАЛЬЧУКТЕРДІҢ АЖЫРАСУЫ
Шілде айының соңында Татьяна Владислав Бакальчукпен ажырасу туралы сотқа шағым түсірді, ал қазан айында ол өзінің бұрынғы тегі – Кимді ресми түрде қайтарды. Татьяна мен Владиславтың жеті баласы бар.
