Астанада 9 желтоқсан ауа температурасының төмендеуіне байланысты бірінші ауысымдағы 0-9 сынып оқушылары қашықтықтан оқыту сипатына көшеді деп хабарлайды Ulysmedia.kz.
Бұл туралы Нұр-Cұлтан қаласының білім басқармасы мәлімдеді.
Елордада ауа райы түнде -28...-30°С, күндіз -15...-17°С аяз болып тұр.
«09 желтоқсанда ел аумағының басым бөлігіне жауын-шашынсыз ауа райын алып келетін, кең антициклонның ықпалында болады. Солайша түнде Қазақстанның солтүстігінде, шығысында және орталығында ауа температурасы 20-25-ке дейін, кей жерлерде 30 аязға дейін, 10 желтоқсанда Шығыс Қазақстан облысының солтүстік-шығысында 35 аязға дейін төмендейді деп күтілуде. Елдің батыс өңірлеріне Қара теңіз аудандарынан циклон әсер ете бастайды. Ол кейінгі екі тәулікте республиканың қалған аумақтарына — шығыс бағыттарына қарай ауысып, өзімен бірге жауын-шашын (жаңбыр, қар), көктайғақ, желдің 15-25 м/с күшеюін алып келеді. 11 желтоқсанның түнінде республиканың солтүстік жартысында ауа температурасы 5-10-ға, кей жерлерде 15-20-ға, Шығыс Қазақстан облысының солтүстік-шығысында 25 аязға дейін болады деп болжанады», – делінген ауа райын болжаушы «Қазгидромет» мекемесінің ескертуінде.
