Қазақстан қайырымдылықтың әлемдік рейтингінде төмендеп кетті

CAF халықаралық ұйымы дайындаған The World Giving Index 2024 есебіне сәйкес, республикамыз 142 елдің ішінде 113-орынға тұрақтады, бұл өткен жылғы көрсеткіштен алты позицияға төмен, ол кезде 107-орында болған едік.

Рейтингтік мәліметтерге сәйкес, Қазақстан мүмкін болатын 100 ұпайдың 33-ін жинады. Бұл нәтиже ТМД-дағы көршілерінен айтарлықтай төмен:

• Ресей – 45 ұпай;
• Өзбекстан – 44 ұпай;
• Қырғызстан – 42 ұпай.

Қайырымдылық индексі азаматтардың басқаларға қаржылық және қаржылық емес түрде көмектесуге дайындығын бағалайды. Рейтингті қалыптастыруға қатысушы елдердің тұрғындары арасында жүргізілген сауалнамалар негіз болды.

Онда мынандай аспектілер ескерілді:

• жомарттыққа дайын болу;
• волонтерлік іс-шараларға қатысу;
• бейтаныс адамдарға көмектесу.

Рейтингтегі көшбасшылар көбіне аса бай елдер емес екенін атап өткен жөн. 2024 жылы алғашқы бестікке Индонезия, Кения, Сингапур, Гамбия және Нигерия кірді.