Цифрлық даму министрлігі қазақстандықтарға eGov mobile қосымшасы арқылы қоғамдық орындарда тегін интернетке қосылуға мүмкіндік бермек, деп хабарлайды Ulysmedia.kz.
Қазір азаматтар қоғамдық орындарда SMS немесе телефон қоңырауы арқылы жіберілген пароль арқылы ғана тегін интернетке қосыла алады.
Министрліктің мәліметінше, қосылымның екі әдісі де ақылы болғандықтан, бұл кәсіпкерлерге үлкен шығын әкеледі. Министрлік кейбір бизнес иелері шығындарды болдырмау мақсатында қауіпсіздік үшін енгізілген аутентификация ережелерін айналып өтетінін айтады.
Енді цифрлық даму министрлігі тегін Wi-Fi-ға арналған құпия сөздерді eGov mobile қосымшасы және SMS хабарламалары арқылы жіберуді ұсынады. Министрлік қоңыраулар арқылы аутентификациядан бас тартпақ.
Бұл азаматтар үшін қолайлы, сәйкестендіру процесін жылдамдатады және қауіпсіздіктің қосымша деңгейін қамтамасыз етеді. eGov-пен интеграция аутентификация үшін мемлекеттік деректерді пайдалануға мүмкіндік береді, бұл алаяқтық қаупін азайтып, пайдаланушыларға қолжетімділікті жеңілдетеді, –делінген министрлік хабарламасында.
Сондай-ақ бұйрық жобасында жүйеге банк картасының нөмірі мен электрондық пошта арқылы да кіруге болатыны айтылған.
Құжат 24 желтоқсанға дейін қоғамдық талқылауда болады.
Тағы оқи отырыңыз: Уақытты ауыстыру. eGov-та жарияланған сауалнама неге жылдам алынып тасталды
