БҰҰ-дағы Ресей өкілі Василий Небензя БҰҰ Қауіпсіздік кеңесінің Украинаға қатысты отырысында Ресей соғысты қатырып қою туралы ұсыныстарды қабылдамайтынын және Украина президент Владимир Путин ұсынған шарттармен келіспегенше соғысты жалғастыратынын мәлімдеді, деп жазады Ulysmedia.kz.
ТОЛЫҒЫРАҚ
«Қақтығысты қатыру немесе уақытша тоқтату схемалары Ресей үшін қолайлы емес. Біз бұл “жаттығудың” мақсаты – Киев режиміне қарулы күштерін қайта жасақтап, жараларын жазуға мүмкіндік беру екенін жақсы түсінеміз. НАТО-ның украин дағдарысын реттеудегі кез келген рөлі туралы сөз қозғаудың да қажеті жоқ – Альянс және Украина үшін мүшелік перспективасы басынан бастап мәселенің бір бөлігі болды, бірақ оны шешудің емес», – деп келтіреді Небензяның сөздерін оның орынбасары Дмитрий Полянский өзінің Telegram-каналында.
ВВС Небензя Мәскеу келіссөздерді бастау үшін қажетті шарттарды да атап өткенін жазады. Полянскийдің арнасында Владимир Путиннің маусым айындағы баяндамасының стенограммасына сілтеме жасалған. Онда Путин егер Украина «ДХР мен ЛХР, сондай-ақ Запорожье және Херсон облыстарынан әскерлерін толық шығаруға» келіссе, яғни Ресей басып алған және халықаралық құқықты елемей өз территориясы деп жариялаған аумақтардан бас тартса ғана келісетінін мәлімдеген.
МАЙДАН ШЕБІ
Украиналық DeepState жобасы өз картасын жаңарту барысында Кураховадан оңтүстікке қарай орналасқан Анновка ауылын ресейліктер басып алғанын, сондай-ақ Анновкадан солтүстік-батысқа қарай Успенское мен Константинопольское ауылдарында олар ілгері жылжығанын тіркеді.
Анновкадан айырылғаны туралы бір күн бұрын украиндық әскери блогерлер хабарлаған еді. Осылайша, Кураховадан 8-10 км оңтүстікте жол бойымен орналасқан Ильинка, Елизаветовка, Романовка, Анновка, Веселый Гай және Успеновка ауылдары арқылы өткен украин қорғанысының ұзақ уақыт ұстап тұрған шебі толығымен жойылды.
Тура бір ай бұрын бұл ауылдардың барлығы украин әскері бақылауында болған. Ресейліктер бұл жол бойымен шамамен 10 км алға жылжып, барлық ауылдарды бір ай ішінде басып алды.
DeepState Курахованың өзінде ресейліктер қаланың қалған тұрғын аудандарының аумағындағы сенімді бақылау аймағын аздап кеңейткенін атап өтті. Қазіргі уақытта Курахованың батыс бөлігіндегі электр станциясының айналасындағы өнеркәсіптік аймақ қана Украина Қарулы Күштерінің бақылауында қалды.
Сонымен қатар, DeepState және басқа да украин дереккөздері фронттың басқа бөлігінде, Великая Новоселкадан оңтүстікке қарай ресейліктер ілгері жылжығанын хабарлады. Онда олар Макаровкадан солтүстікке қарай біраз алға жылжып, ауыл мен ондағы украин гарнизонын тылдан оқшаулап жатыр.
