"Мирзияевтың адамдарын өлтірмек болған". Өзбекстан Шешенстан тумаларына іздеу жариялады

Тиісті ақпарат Интерполдың сайтында жарияланған, деп хабарлады Кавказ.Реалии.

МӘН-ЖАЙЫ

Темирханов пен Расаев қаруды заңсыз айналымға шығару, қылмысты жасыру немесе хабарламау күдігі бойынша іздестірілуде. Сонымен қатар, Расаев контрабанда жасады деп айыпталуда.

Взгляд.uz мәліметінше, екі шешен азаматы Өзбекстан президенті әкімшілігінің бұрынғы орынбасары Комил Алламжоновқа және Ұлттық перспективалық жобалар агенттігінің басшысы Дмитрий Лиге жасалған қастандық ісі бойынша іздестіріліп жатыр. Басылымның дерегіне сәйкес, олардың бірі Өзбекстанға Қырғызстанмен шекара арқылы кірген, ал екіншісі елге заңсыз жолмен келген. Олар 1,5 миллион доллар үшін Алламжонов пен Лиге қастандық жасауға келіскені айтылады.

Шешенстан басшысы Рамзан Қадыров бұған дейін Алламжоновқа шабуылдағы "шешен ізі" туралы нұсқаны "арандатушылық ақпарат" деп атаған. "Егер мен шынымен бірдеңе жоспарласам, оны 100 пайыз нәтижемен соңына дейін жеткізер едім," – деді ол.

2021 жылы Стамбул прокуратурасы Шешенстан оппозициясына қарсы шабуылдар жоспарлады деген күдікпен төрт ресейлікті, сондай-ақ Украина және Өзбекстан азаматтарын ұстағанын хабарлаған. Ұсталғандардың арасында Бислан Расаевтың аты аталған.

ҚАСТАНДЫҚ

Комил Алламжоновқа қастандық 26 қазанда, Өзбекстандағы парламенттік сайлау қарсаңында жасалды. Белгісіз адамдар Ташкент маңындағы шенеуніктің үйіне жақын жерде оның көлігіне оқ атқан. Алламжонов пен оның жүргізушісі тірі қалған.

Өзбек билігі бірнеше адам ұсталғанын хабарлады, бірақ олардың есімдерін жарияламады. Азаттық Радиосының өзбек қызметі ұстағандардың бірі – Шохрух Ахмедов екенін анықтады. Ол бұған дейін Түркияда ұсталып, Шешенстан басшысы Рамзан Қадыровты сынаған шешеннің өліміне қатысы бар деген айыппен айыпталған. Ахмедов Түркиядан депортацияланып, кейін Өзбекстанда кәсіпкер Джавлон Юнусовтың жүргізушісі болып жұмыс істеген. Қараша айының ортасында Юнусовтың Оңтүстік Кореяда ұсталғаны белгілі болды.