Оңтүстік Кореяда тергеушілер уақытша қызметінен шеттетілген, бірақ әлі де елді басқарып отырған Юн Сок Ёльді бүлік ұйымдастырды деген айыппен қамауға алды, деп хабарлайды Ulysmedia.kz порталы Yonhap-қа сілтеме жасап.
- Басқарма президент Юн Сок Ёльді бүлікті басқарды деген айыппен қамауға алды, – делінген агенттік хабарламасында.
Сәрсенбі, 15 қаңтар күні таңертең тергеушілер ел басшысының резиденциясына оны қамауға алу үшін келді. Алайда тергеушілер президенттің қауіпсіздік қызметімен қақтығысып қалған. Шамамен 2,5 сағаттан кейін полиция мен жоғары лауазымды тұлғалардың жемқорлығын тергеу басқармасының (CIO) қызметкерлері баспалдақ арқылы резиденцияға кірді.
АРНАЙЫ ОПЕРАЦИЯ
Олар резиденция ішінде бірнеше қоршаудан өтті, олардың әрқайсысының жанында президенттің күзеті көліктер мен автобустар қатарын құрып тосқауыл қойған. Операцияға шамамен 200 полицей мен CIO-ның 40 тергеушісі қатысты.
Кейін Юн Сок Ёль қайғылы оқиғалардың алдын алу үшін тергеуге өзі келу туралы шешім қабылдағаны белгілі болды. Сонымен қатар, президент резиденциясын күзететін әскери бөлімшелер тергеушілерге қамауға алу ордерін орындауға кедергі жасамауға келісті.
БҰҒАН ДЕЙІНГІ ӘРЕКЕТ
3 қаңтар күні оңтүстіккореялық тергеушілер уақытша шеттетілген президентті қамауға алу ордерін орындауға әрекеттенген болатын, бірақ президенттің қауіпсіздік қызметімен бес сағаттан астам уақытқа созылған қақтығыстан кейін бас тартуға мәжбүр болды. Жоғары лауазымды тұлғалардың жемқорлығын тергеу басқармасы журналистерге президентті қамауға алу ордерін орындаудан оқиға орнындағы қызметкерлердің қауіпсіздігіне қауіп төнгендіктен бас тартқанын түсіндірді.
Юн Сок Ёльге елде әскери жағдай енгізгені және парламент депутаттарының оны жою үшін дауыс беруіне кедергі жасау мақсатында әскер жібергені үшін бүлік ұйымдастыру және билікті асыра пайдаланды деген айып тағылып отыр.
АЙТА КЕТЕЙІК
Юн Сок Ёль – Оңтүстік Кореяның тоғызыншы басшысы. 1980 жылдан бері Корея Республикасында сегіз президент болды. Олардың төртеуі бас бостандығынан айырылды, біреуі өз-өзіне қол жұмсады.
