Атырауда жасөспірім көлік жүргізіп, жол апатына ұшырады. Салдарынан көліктегі жолаушы қаза тапты, деп хабарлайды Ulysmedia.kz.
МӘН-ЖАЙ
“Ақ жайық” мәліметінше, қайғылы оқиға өткен түнде Атырау-Дамба тас жолында болған. 2007 жылы туған жасөспірім басқарған ВАЗ-2170 көлігі Toyota Camry көлігімен соқтығысқан.
Апат салдарынан ВАЗ-2170 көлігінің 2009 жылы туған жолаушысы оқиға орнында қайтыс болды. Сонымен қатар, бір жолаушы мен жүргізуші ауруханаға жеткізілді. Қазіргі уақытта тергеу амалдары жүргізіліп жатыр.
АЛМАТЫДАҒЫ ЖАҒДАЙ
Күні кеше Алматыда қаласындағы Әл-Фараби даңғылының бойында болған жол апатынан 39 жастағы әйел қаза тапты.
Таңғы 5:30-да Toyota көлігінің 20 жастағы жүргізушісі рөлге ие бола алмай жол жиегіндегі жаяу жүргіншіні қағып өтіп, артынша жарнама тақтайшасына соғылған.
Алматы полициясының хабарлауынша, оқиға бойынша қылмыстық іс қозғалды.
