Мәжіліс депутаты Мұрат Әбенов жаңа Құрылыс кодексіне енгізілетін өзгерістер мен олардың кімге ұнамай жүргені туралы айтты, деп хабарлайды Ulysmedia.kz.
ҚОҒАМДЫҚ ПАЛАТА ОТЫРЫСЫ
7 ақпанда Мәжілісте Құрылыс кодексі жобасы бойынша Қоғамдық палата отырысы өтті. Әбенов журналистерге берген сұхбатында түзетулердің негізгі мақсаты – құрылыс саласындағы мемлекеттік бақылауды күшейту екенін мәлімдеді.
Оның айтуынша, қазіргі уақытта кейбір компаниялар үйлерді рұқсат етілмеген жерлерге салып, тұрғындар салынған баспананың сапасы мен инфрақұрылымның жоқтығына жиі шағымданады.
— Мектептер, балабақшалар салып тастайды, ал үш жылдан кейін бұл мектеп апатты жағдайға түседі. Ең бастысы, адам шығыны жоқ. Бірақ негізінен компаниялар тендерде жеңіп алады, өздері салады, өздері тексереді, өздері пайдалануға береді, ал оларды ешкім бақыламайды.
Көптеген жағдайда әкімдіктер зауыт маңынан немесе тығыз салынған аудандардан үй тұрғызуға көз жұма қараған. Немесе, мысалы, құжатсыз үй салып, оны халыққа сата бастайды, – деді ол.
ҚЫСЫМ
Депутат белгілі бір топтардың Құрылыс кодексі бойынша жұмысты тоқтатуға қысым жасап жатқанын айтты. Нақты кім туралы айтып отырғаны сұралғанда, депутат “арам пиғылды құрылысшылар мен жобалаушылар” деп түсіндірді.
— Кодекс бойынша жұмысты тоқтатқысы келетіндер бар, өйткені ол өзгерістер енгізіп, мемлекеттік бақылауды күшейтеді. Әрине, заңнаманың кемшіліктерінен пайда тауып келгендер үшін бұл саланың реттелмеген күйде қалғаны маңызды.
Адал жұмыс істейтін, бәсекеден қорықпайтын құрылыс компаниялары мен жобалау ұйымдары керісінше бәрінің реттеліп, дұрыс ережелер қабылданғанын қалайды. Негізінен, сапасыз, адал жұмыс істемейтіндер (қысым жасап отыр – ред.). Оларды арам құрылысшылар, адал жұмыс істемейтін жобалаушылар деп атайық.
Еске сала кетейік, Құрылыс кодексінің жобасы өткен жылы қызу талқылауға түсті. Сол кезде Мәжіліс депутаты Бақытжан Базарбек құжатты “мектеп оқушысының рефераты” деп атаған болатын. Ол заң жобасында құрылыс компанияларының мүддесін лоббилеу элементтері бар екенін ашық айтқан.
