АҚШ БҰҰ Бас Ассамблеясына Ресейдің Украинаға қарулы басып кіруінің үшінші жылдығына орай америкалық резолюцияны қолдауға үндеу жасады. Бұл құжат бойынша дауыс беру 24 ақпан, дүйсенбі күні өтпек, деп хабарлайды Ulysmedia.kz.
АҚШ БҰҰ БАС АССАМБЛЕЯСЫНА АМЕРИКАНДЫҚ РЕЗОЛЮЦИЯНЫ ҚОЛДАУҒА ШАҚЫРДЫ
Сонымен қатар, Вашингтон БҰҰ-ға мүше елдерден кез келген түзетулерді қабылдамауды және Украинаның еуропалық одақтастарымен бірге ұсынған балама резолюция жобасына қарсы дауыс беруді талап етті.
АҚШ РЕЗОЛЮЦИЯСЫНЫҢ МАҚСАТЫ – СОҒЫСТЫ ТОҚТАТУ
23 ақпанда таратылған дипломатиялық нотада, оның көшірмесі Reuters агенттігінің қолында бар, АҚШ өз құжатын "болашаққа бағытталған, басты мақсаты – соғысты тоқтату" деп сипаттайды. Құжатта АҚШ жобасының қабылдануы БҰҰ-ға мүше елдерге "халықаралық бейбітшілік пен қауіпсіздікті нығайтуға нақты серпін береді, бұл Біріккен Ұлттар Ұйымының басты мақсаты болып табылады" деп көрсетілген.
АҚШ резолюциясының мәтінінде "Ресей мен Украина арасындағы қақтығыс" салдарынан адамдардың қаза тапқанына өкініш білдіріліп, оны тез арада аяқтау қажеттігі баса айтылады. Сондай-ақ, екі ел арасында ұзақ мерзімді бейбіт шешімге келудің маңыздылығы атап көрсетілген.
АҚШ ЖОБАСЫ УКРАИНА МЕН ЕО ҰСЫНҒАН РЕЗОЛЮЦИЯҒА ҚАРСЫ
Бұл құжат Украина мен Еуропалық Одақ ұсынған резолюция жобасына қайшы келеді. Соңғы бір ай бойы талқыланып келе жатқан бұл жоба Ресейден дереу басып алған украин жерлерінен әскерін шығаруын және әскери әрекеттерді тоқтатуды тікелей талап етеді. Бұл талаптар бұған дейін БҰҰ қабылдаған шешімдерге сәйкес келеді.
Соғыстың басталғанынан бері БҰҰ Бас Ассамблеясы көпшілік дауыспен Украина егемендігі мен оның халықаралық деңгейде мойындалған шекараларын қолдайтынын бірнеше рет растады. Алайда, АҚШ резолюциясының мәтінінде бұл мәселе мүлдем қозғалған жоқ.
УКРАИНА НЕ ІСТЕЙДІ?
АҚШ-тың қысымына қарамастан, Украина өзінің резолюциясын дауыс беруден алып тастап, американдық жобаға қолдау көрсетуге келіскен жоқ. Бұл туралы Associated Press агенттігіне америкалық шенеунік пен еуропалық дипломат хабарлады. "Бәсекелес резолюциялар бойынша қызу лоббизм және қысым көрсету жүріп жатыр. АҚШ Украина мен еуропалықтарды өз жобасынан бас тартуға мәжбүрлеуге тырысуда", – деп мәлімдеді еуропалық дипломат.
Украина ұсынған жобада Ресейден "барлық қарулы күштерін Украинаның халықаралық деңгейде мойындалған шекараларынан дереу, толық және сөзсіз шығару" талап етіледі. Ал АҚШ жобасында "Украинадағы қақтығыс салдарынан адамдардың трагедиялық қазасы" атап өтіліп, "қақтығысты тез арада тоқтату, оның түпкі себептерін жою" және Украина мен Ресей арасындағы тұрақты бейбітшілікті орнату қажеттігі көрсетілген.
"Бәсекелес резолюциялар АҚШ, Украина және Еуропа елдері арасындағы соңғы бес аптадағы шиеленісті одан әрі күшейте түсті. Бұл шиеленіс АҚШ президенті Дональд Трамптың қызметке кірісіп, Ресеймен ұзақ уақыт бойы оқшауланудан кейін келіссөздер жүргізу әрекетінен басталды", – деп атап өтті ақпарат агенттігі."
Associated Press агенттігінің хабарлауынша, "қақтығыстың түпкі себептерін жою" туралы тұжырым АҚШ резолюциясына Ресейдің БҰҰ-дағы тұрақты өкілі Василий Небензияның ұсынысы бойынша енгізілген.
