TikTok (Douyin) қосымшасының қытайлық нұсқасын жасаушылар 14 жасқа дейінгі балаларға арналған контентті қарау уақытын шектеді, деп хабарлайды ulysmedia.kz.
lenta.ru-дың хабарлауынша, бұдан былай Қытайдағы 14 жасқа дейінгі балалар аталған қосымшаны сағат 06:00-22:00 аралығындағы уақытта 40 минут қана қолдана алады. Жасөспірімдерге арналған режим TikTok-қа өз аты-жөндерімен тіркелген барлық балаға қолданылады.
Бұл шешім кәмелеттік жасқа толмаған балаларды қосымшаның жағымсыз әсерінен қорғау үшін қабылданған. Осы қосымшаның бәсекелесі – Kuaishou мобильді қосымшасы мұндай шешімді 2019 жылы қабылдаған болатын.
Сондай-ақ, Қытайда кәмелеттік жасқа толмаған балаларға видеоойын ойнау уақыты да шектелген. 18 жасқа толмаған балалар видеоойынды аптасына 3 сағаттан артық ойнай алмайды.
