Қарапайым тұрмыстық эксперимент ресми инфляция көрсеткіштерін тағы да растады. Қазақстан азаматы 2024 жылдың басында супермаркеттен азық-түлік сатып алып, түбіртегін сақтап, араға бір жыл салып, дәл сол өнімдерді қайта сатып алғн. Нәтижесінде, азық-түлік себетінің құны 21%-ға қымбаттағаны анықталды. Бұл дерек әлеуметтік желіде қызу талқыланып, көпшілікті таңғалдырды, деп хабарлайды Ulysmedia.kz.
Азық-түлік инфляциясы расталды
Бағаның ең үлкен өсімі халық жиі тұтынатын негізгі азық-түліктерден байқалды:
Пияз – 74 теңгеден 144 теңгеге дейін (өсім – шамамен екі есе);
"Цесна" ұны – 803 теңгеден 1067 теңгеге дейін;
Тауық филесі – 2589 теңгеден 2693 теңгеге дейін;
"Макфа" қарақұмық жармасы – 765 теңгеден 799 теңгеге дейін;
Күріш – 1155 теңгеден 1199 теңгеге дейін.
Бір қарағанда, кей өнімдердің қымбаттағааны аса қатты байқалмауы мүмкін. Алайда күнделікті шығындарға келгенде мұндай өсім айтарлықтай ауыртпалық салатыны сөзсіз.
Азық-түлік бағасы жаппай қымбаттағанымен, кейбір тауарлар бағасын тұрақты сақтап қалған:
"Макфа" макароны – 447 теңгеден 445 теңгеге дейін аздап арзандаған;
Қияр – 995 теңгеден 989 теңгеге төмендеген.
2024 жылы азық-түлік себетінің жалпы құны 33 249 теңге болса, 2025 жылы дәл сол өнімдер үшін 40 272 теңге төлеуге тура келген. Яғни, бір жылда баға 7023 теңгеге, яғни 21%-ға өскен.
Әлеуметтік желі қолданушылары бұл деректерге ерекше назар аударып, соңғы жылдардағы азық-түлік бағасының бақылаусыз қымбаттауына алаңдаушылық білдірді. Көпшілік билік тарапынан нақты шаралар қабылдануы керектігін айтып, пікір қалдырды.
