Ішкі істер министрлігі Мәжілістің бұрынғы спикері Нұрлан Нығматулиннің ұлы Нұржан Нұрлановқа қатысты тергеу жүргізіп жатыр, деп хабарлайды Ulysmedia.kz.
ТАҒЫ БІР НЫҒМАТУЛИН
Министрліктің мәліметінше, қылмыстық іс Қылмыстық кодекстің 389-бабы — "Өз бетінше билік ету" бойынша тергеліп жатыр.
"Аталған факті бойынша Алматы қалалық полиция департаментінің тергеу басқармасы Қылмыстық кодекстің 389-бабы ("Өз бетінше билік ету") бойынша сотқа дейінгі тергеу амалдарын жүргізуде. Қазіргі уақытта істің мән-жайын жан-жақты, толық және объективті зерттеу үшін тергеу әрекеттері жүргізілуде", — деп мәлімдеді ІІМ.
НҰРЖАН НҰРЛАНОВ
2019-2022 жылдар аралығында «ҚазМұнайГаз-Аэро» ЖШС-ның директоры қызметін атқарған. Ал бұған дейін «Бәйтерек» ұлттық холдингінің мүшесі болған. Жалпы, әкесі билікте қызмет еткен кезеңдерде Нұржан Нұрланов квазимемлекеттік секторда лауазамды қызметтер атқарған.
БҰҒАН ДЕЙІН
Мәжілістің экс-төрағасы Нұрлан Нығматулиннің ағасы Арғын Нығматулинге іздеу жарияланған еді.
МӘН-ЖАЙ
Іздестіру ісі 3 наурызда Астанада тіркелген.
Іздестіруді Сыбайлас жемқорлыққа қарсы іс-қимыл агенттігі жүргізеді.
Бас прокуратураның баспасөз қызметі қазіргі уақытта Нығматуллин А. З. және басқа тұлғаларға қатысты Қарағанды облысында хоккейді дамытуға бөлінген бюджет қаражатын жымқыру бойынша іс тергеліп жатқанын мәлімдеді.
АРҒЫН НЫҒМАТУЛИН КІМ?
Арғын Нигматулин 1955 жылы Қарағандыда дүниеге келген. 2006 жылдан бастап «Сарыарқа» хоккей клубы» коммуналдық мемлекеттік кәсіпорнының директоры қызметін атқарған, Қарағанды облыстық мәслихатының үш шақырылымының депутаты болған, Шығыс Қазақстан облысының Әділет министрлігі Тіркеу қызметі комитетінің «Жылжымайтын мүлік орталығы» РМК-ны басқарған. «Сарыарқа» хоккей клубы» коммуналдық мемлекеттік кәсіпорнының директоры болған.
