Ресей Қорғаныс министрлігі Қазақстандағы экологиялық заңбұзушылықтар бойынша кездесулерден екі рет бас тартты, деп хабарлайды Ulysmedia.kz.
ТЕКСЕРІС
Қазақстан экология министрлігі Батыс Қазақстан облысындағы Ресей жалға алып отырған әскери полигондарда экологиялық жағдайды тағы да тексеруді жоспарлап отыр. Бұл полигондарда Ресей зымыран сынақтарын жүргізеді.
Курсив мәліметінше, бұл полигондардағы экологиялық заңбұзушылықтарды талқылау үшін Ресей тарапына бірнеше рет ұсыныс жасалған. Алайда Ресей қорғаныс министрлігі «белгілі бір себептерге байланысты дайын емеспіз» деп, алдын ала келісілген екі кездесуді де өткізбей қойған.
Қоршаған ортаны қорғау министрлігі ресейлік тарапқа 2024 жылдың қарашасында және 2025 жылдың ақпанында ресми түрде хат жолдағандарын атап өтті.
Министрлік бұл тексерулердің қорытындысы бойынша Қазақстан Қорғаныс министрлігіне арнайы ұсыныстар дайындалатынын айтты. Онда келіссөздер ұйымдастыру және экологиялық сипаттағы мәселелерді шешу жайы қамтылмақ.
ҚАЗАҚСТАННЫҢ ҚОРҒАНЫС МИНИСТРЛІГІ НЕ ДЕЙДІ
Өз кезегінде, Қазақстанның Қорғаныс министрлігі де экология министрлігінің талаптарын қолдайтынын және ресейлік әріптестеріне бірнеше рет ресми түрде жүгінгендерін растады.
АНЫҚТАМА ҮШІН
Ашық дереккөздерге сүйенсек, Қазақстан аумағында Ресей жалға алып отырған үш ірі әскери сынақ полигоны бар. Олардың жалпы аумағы – 8,6 миллион гектардан асады. Бұл жерлерде тұрақты түрде шамамен 900 ресейлік әскери қызметкер орналасқан.
2023 жылдың мамырында Мәжіліс депутаты Серік Егізбаев Ресей бұл жерлерді Қазақстаннан «азғантай ақшаға» жалға алып отырғанын айтқан. Яғни, бір гектар жер үшін жылына небәрі 1050 теңге төлейді. Бұл сома 2005 жылдан бері өзгермеген.
