АҚШ президенті Дональд Трамптың қызметіне деген халықтың қолдауы 100 күндік басқару қорытындысында соңғы 80 жыл ішіндегі ең төменгі деңгейге түсті, деп хабарлайды Ulysmedia.kz.
Ipsos компаниясы, ABC News телеарнасы және The Washington Post газетінің бірлескен сауалнамасы нәтижесінде, тек 39% америкалықтар Трамптың қызметін қолдаған, ал 55% теріс пікір білдірген. Сауалнама 18-22 сәуір аралығында 2464 АҚШ азаматының қатысуымен жүргізілген.
ТРАМПТЫҢ БИЛІККЕ ТАЛПЫНЫСЫ ХАЛЫҚТЫҢ НАРАЗЫЛЫҒЫН ТУҒЫЗДЫ
The Washington Post мәліметінше, америкалықтардың басым бөлігі Трамптың мемлекет басшысының өкілеттілігін кеңейту әрекеттеріне қарсы шықты. Мемлекеттік қызметкерлерді жұмыстан босату, федералды агенттіктерді жабу және саяси қарсыластарға қарсы шаралар қолдану сияқты әрекеттер оның беделіне кері әсер еткен. Газет жариялаған деректерге сәйкес, 100 күндік межеде Трамптың рейтингі АҚШ президенттерінің ішінде ең төмен көрсеткіш болды.
АҚШ ХАЛҚЫНЫҢ ҚАРЖЫЛЫҚ ЖАҒДАЙЫ НАШАРЛАДЫ
Сауалнама барысында респонденттердің 67%-ы Трамптың қор нарығының құлдырауына қатысты әрекеттеріне көңілі толмайтынын жеткізді. 64% шетелдік тауарларға салынған баж салығына қарсы екенін айтты. Ал 61% АҚШ-тың сыртқы саясатын сынады. 72% америкалықтар Трамптың саясаты елді жақын арада рецессияға алып келеді деп есептейді. Сонымен бірге, 40%-дан астамы жеке қаржылық жағдайларының нашарлағанын мәлімдеді.
ТРАМП САУАЛНАМА НӘТИЖЕЛЕРІНЕ ҚАРСЫ ШЫҚТЫ
Truth Social желісінде жариялаған жазбасында Дональд Трамп сауалнама нәтижелерімен келіспейтінін білдірді. Ол бұқаралық ақпарат құралдарын бұрмаланған ақпарат таратады деп айыптап, оларды "халық жауы" деп атады.
