Мамырда ауа райы қандай болады

Мамыр айында Қазақстанның басым бөлігінде орташа ауа температурасы климаттық нормадан 1°С-қа жоғары болады деп күтілуде. Шығыс Қазақстан облысында, Алматы облысының оңтүстік-шығыс жартысында, сондай-ақ Жетісу мен Абай облыстарында температура нормамен шамалас болады.

Мамырдағы жауын-шашын мөлшері республиканың көп өңірлерінде нормадан төмен болады деп болжанады. Ал еліміздің солтүстік-батыс, солтүстік аймақтарында, Қызылорда, Түркістан, Жамбыл облыстарының оңтүстігінде, сондай-ақ Алматы, Шығыс Қазақстан, Жетісу мен Абай облыстарының оңтүстік-шығысында жауын-шашын мөлшері нормаға жуық жауады.

Мамырдың бірінші онкүндігінде жаңбыр, найзағай, екпінді жел күтіледі. Елдің оңтүстігі мен оңтүстік-батысында шаңды дауылдар болуы мүмкін. Тек кей күндері республика бойынша аз бұлтты, жауын-шашынсыз ауа райы күтіледі.

Температура мынадай диапазонда болады деп болжанады:

• Батыс өңірде түнде +4…+9°С-тан +9…+14°С-қа дейін, күндіз +15…+20°С-тан +22…+30°С-қа дейін;
• Оңтүстік-батыста түнде +10…+15°С-тан +12…+20°С-қа дейін, күндіз +20…+25°С-тан +25…+33°С-қа дейін;
• Солтүстік-батыс, солтүстік, шығыс және орталық өңірлерде түнде 0…+5°С, кей жерлерде 1–6°С үсік, кейін +8…+15°С-қа дейін, күндіз +10…+18°С-тан +23…+30°С-қа дейін;
• Елдің оңтүстік жартысында ауа температурасы біртіндеп жоғарылап, түнде +5…+12°С-тан +15…+20°С-қа, күндіз +18…+25°С-тан +28…+35°С-қа дейін жетеді.

Мамырдың екінші және үшінші онкүндіктерінде елдің көп бөлігінде түнгі температура +2…+7°С-тан +10…+15°С-қа дейін, күндіз +10…+15°С-тан +25…+30°С-қа дейін ауытқиды. Суық антициклонның өтуіне байланысты кейбір күндері түнгі уақытта 1–6°С-қа дейін үсік жүруі мүмкін.

Елдің оңтүстігі мен оңтүстік-шығысында ауа температурасы +28…+36°С-қа дейін көтеріледі, алайда мұндай ыстық күндер ауысып, температура +20…+25°С-қа дейін төмендейтін салқын күндермен алмасуы мүмкін. Арктикалық ауа массаларының енуіне байланысты топырақ бетінде 2°С-қа дейін үсік жүру ықтималдығы бар.