Ulysmedia.kz редакциясы Астана қаласы әкімдігіне ресми сауал жолдап, Астанадағы Кенесары ескерткіші қашан тұғырына қайта қойылатынын біліп көрді.
ЕСКЕРТКІШТІҢ ҚҰЛАУ ҚАУПІ ТУЫНДАДЫ
Астана қаласының мәдениет басқармасы жолдаған жауапта атап көрсетілгендей, тарихи-мәдени мұраны сақтау мақсатында 2023 жылы қыркүйекте Есіл өзенінің жағалауында орналасқан Кенесары хан ескерткішіне ғылыми-техникалық зерттеу жүргізілген. Зерттеу нәтижесі бойынша нысан апатты жағдайда деп танылған. Ескерткіштің іргетасы қисайып, құлау қаупін тудырған.
КІМ ЖӨНДЕП ЖАТЫР
«Астана қаласындағы Кенесары хан ескерткішінің тұғыры мен іргетасына жөндеу-реставрациялау жұмыстары» бойынша жобалық-сметалық құжаттама оң қорытындысын алған. Мемлекеттік сатып алу рәсімдерінің қорытындысы бойынша, 2024 жылы 30 шілдеде конкурс жарияланып, соның нәтижесінде «КОНТИНЕНТ PLAST» ЖШС жеңімпаз деп танылған.
ҚАШАН ТҰҒЫРЫНА ОРНАТАДЫ
2024 жылдың қараша айында ескерткіштің бөлшектеу жұмыстары аяқталды. Биыл 20 наурыздан бастап жөндеу-реставрациялау жұмыстары жалғасып жатыр. Жұмыстардың аяқталу мерзімі – 2025 жылғы 30 маусым, – делінген жауапта.
Биыл қаладағы басқа ескерткіштерде жөндеу-реставрациялау жұмыстарын жүргізу жоспарланбаған.
Астанадағы Есіл өзенінің жағасында тұрған Кенесары ханның ескерткішін бұзып, орнынан алып жатқан сәт желіде бұған дейін жарияланған еді.
Хан Кенесарының ескерткіші – Астананың көрікті жерлерінің бірі. Бұл Қазақстандағы ең керемет ат спорты ескерткіштерінің бірі болып саналады, ол азаматтардың ғана емес, туристердің де таңданысын тудырды. Мүсінші Нұрлан Далбай мен сәулетші Шота Уәлиханов жасаған мүсін – гранит тұғырға орнатылған ат үстіндегі ханның қола мүсіні.
