Қазақстандағы Италияның төтенше және өкілетті елшісі Антонелло де Риу Ulysmedia.kz тілшісінің Қашаған кен орнынан түсетін пайданы жоғалту ісі бойынша Қазақстанның NCOC-ке қарсы талап-арызына қатысты сауалына жауап берді.
ИТАЛИЯ ТАЛАП-АРЫЗҒА ҚАРСЫ ЕМЕС
– Ондай жайттар бұрын да болған, бола береді. Бұл қалыпты жағдай. Себебі мұнда ірі инфрақұрылымдық жобалар мен орасан қаржы туралы сөз болып отыр. Сондықтан мұндай даулар – әдепкі құбылыс, – деп есептейді Антонелло де Риу.
Консорциум мүшелерінің қатарында бұл дауға қатысты пікір білдіруден бас тартып отырған италиялық мұнай алыбы Eni де бар.
Дипломаттың пікірінше, тараптар кейінірек келісімге келеді.
– Мұндай қақтығыстар уақыт өте келе шешіледі. Бұл – ірі компаниялар арасындағы дауды шешудің қалыпты жолы, салауатты қарым-қатынастың белгісі, – деді елші.
КОНТЕКСТ
Еске салайық, 2023 жылғы сәуірде Қазақстан Қашаған кен орнын игеру басталғалы 15 миллиард долларлық кешігулер, техникалық мәселелер мен артық шығындар үшін халықаралық арбитражға жүгінген болатын.
