Атом энергиясы жөніндегі халықаралық агенттік (АЭХА) АҚШ-тың Ирандағы ядролық нысандарға жасаған соққыларына байланысты Басқарушылар кеңесінің шұғыл отырысын өткізетінін мәлімдеді. Бұл туралы агенттік басшысы Рафаэль Гросси айтты, деп хабарлайды Ulysmedia.kz.
МӘН-ЖАЙ
Отырыс дүйсенбі күні өтеді. АҚШ-тың Фордо, Исфахан және Натанздағы ядролық кешендерге жасаған авиациялық соққылары себеп болғаны нақтыланып отыр. Вашингтон бұл нысандар толық жойылды деп мәлімдеді. Ал Тегеран әзірiе зардаптарға қатысты пікір білдірген жоқ.
АЭХА-ның ресми мәлімдемесінде агенттік ядролық нысандардан тыс жерлерде радиациялық фонның жоғарылауын тіркемегенін атап өткен.
— Ирандағы үш ядролық нысанға жасалған шабуылдан кейін агенттік қазіргі уақытта бұл нысандардың сыртында радиациялық деңгейдің артуы байқалмағанын растайды, — делінген ұйымның X әлеуметтік желісіндегі ресми парақшасында жарияланған жазбада.
Тегеран мен Тель-Авив арасындағы шиеленістің күшейген тұста агенттік пен оның басшысы Рафаэль Гросси иран билігінің сынына ұшырады.
Иран тарапы АЭХА-ның “қарама-қайшы мәлімдемелері” Израильдің әскери кампаниясын бастауына түрткі болуы мүмкін екенін алға тартты.
