Израиль әскері Газа секторының солтүстігіндегі тұрғындарға әскери операцияның жаңа кезеңіне дайындық ретінде эвакуациялануды бұйырды. Премьер-министр Биньямин Нетаньяху шұғыл кеңес өткізді, ал АҚШ тез арада бітімге келуге шақырып отыр, деп хабарлайды Ulysmedia.kz.
Жексенбі күні Израиль әскері Газа секторының солтүстік және шығыс бөліктеріндегі, соның ішінде Джабалия босқындар лагеріндегі тұрғындарға шұғыл эвакуация туралы нұсқау берді. Адамдарға Израиль әскері (ЦАХАЛ) бұл аймақтарда шабуылды күшейтпек болғандықтан, оңтүстіктегі Муваси ауданына көшу тапсырылды. ЦАХАЛ-дың ресми өкілі Авихай Эдраидың айтуынша, бұл аймақтар келесі шабуылдың негізгі нысанасына айналады. Израиль БАҚ-ы жаңа әскери операцияның ауқымы алдыңғылардан өзгеше болатынын жазады.
АҚШ президенті Дональд Трамп тараптарды дереу атысты тоқтатып, келісімге келуге шақырды. «Газада келісімге келіңдер. Тұтқындарды босатыңдар!» деп жазды ол әлеуметтік желілерде. Бұған дейін Трамп бітімге жақын күндері қол жеткізілуі мүмкін екенін айтқан болатын.
Осы мәлімдемелер аясында Израиль премьер-министрі Биньямин Нетаньяху қорғаныс министрімен және ЦАХАЛ бас штабының бастығымен кеңес өткізіп, алдағы әрекеттердің стратегиясын талқыламақ.
Қазір Газадағы жағдай ушыға түсті. Жұма кешінде басталып, сенбі таңына дейін жалғасқан Израиль әуе соққыларының салдарынан кемінде 60 адам қаза тапты. Бұл жөнінде палестиналық медицина қызметкерлері хабарлады.
