Қасым-Жомарт Тоқаев бизнес өкілдерімен кездесуінде осылай деді, деп хабарлайды ulysmedia.kz.
«Бізге жаңа парақты ашып, жаңа Қазақстанның негізіне айналуы тиіс жаңа экономикалық саясатты құруда бірлесіп жұмыс істеу керек», - деді.
Мемлекет басшысы жаңа экономикалық саясаттың негізгі қағидаттары адал бәсекелестік, қабылданатын шешімдердің ашықтығы, мемлекеттік саясаттың болжамдылығы, бизнестің салықтық адалдығы, кәсіпкерлердің әлеуметтік жауапкершілігі болуы керектігін баса айтты.
«Әлеуметтік-экономикалық реформалардың сәтті жүзеге асуына ірі бизнес, біздің буржуазия мүдделі екеніне толық сенімдімін. Өйткені елдің бизнес-элитасы көп нәрсе жоғалтуы мүмкін. Бірақ, сонымен қатар, олардың бизнесін одан әрі кеңейту үшін жақсы мүмкіндіктер бар», - деп қосты Мемлекет басшысы.
Президент Қасым-Жомарт Тоқаев «Қазақстан халқына» қорына бір күндік жалақыны аудару бастамасына қарсы екенін мәлім етті.
«Бұл жерде формализм деген атымен болмауы тиіс. Мемлекеттік қызметшілердің, бюджеттегілердің бір күндік жалақысын аудара бастапты. Бұл – мүлде қажеті жоқ бастама. Тағы да бір рет атап өтейін – бұл бюджеттік қор емес. Қазақстан халқының қоры. Сол себепті аталмыш жұмыс қандай да бір бюрократиялық процедурасыз өтуі тиіс. Барынша ашықтық керек. Ірі компаниялардың бәрі де үкіметпен айқындалған пайызды береді... Бизнес-бірлестік біздің бастамамызды шын ниетімен қолдап, қорға көмектесер деген үміттемін», - деді ол.
Айта кетсек елордада бүгін президент елдегі ірі бизнес өкілдерімен кездесу өткізіп жатыр.
