Астанада Перизат Қайрат пен оның анасы Гайни Алашбаеваға қатысты қылмыстық іс бойынша сот отырысы жалғасып жатыр. Оларға 3,5 млрд теңге жымқырды деген айып тағылған. Бұл қаражаттың бір бөлігі Газа тұрғындарына көмек ретінде жиналған болатын. Бүгінгі отырыста блогерлер куәлік беріп, сотта өздері қорға аударған нақты сома мен қайырымдылық туралы айтып берді, деп хабарлайды Ulysmedia.kz.
ЖАЛПЫ СОМА
Дүйсенбі күнгі прокурорлардың сөзінше, Перизат Қайрат пен оның анасы 3,5 млрд теңге ұрлады деп айыпталып отыр. Оның 566 млн теңгесі – Палестинаға көмек көрсету үшін жиналған қаражат.
АСАР-УМЕ
"Асар-Уме" қоғамдық қорының президенті Асхат Нұрмашевтің айтуынша, 2023 жылғы 1 қарашада Перизат Қайрат Палестина елшілігімен бірге Газа тұрғындарына көмек жинау бастамасын жариялаған. Халықаралық гуманитарлық көмекті ұйымдастыру тәжірибесі болмағандықтан, олар Перизат Қайратқа жүгінген. Нұрмашевтің айтуынша, Перизат оларды Палестина елшілігімен таныстырған және гуманитарлық көмектер жиналатын халықаралық қойманы көрсеткен. "Асар-Уме" қоры Biz Birgemiz қорына 200 млн теңге аударған. Жалпы жиналған сома – 293 млн теңге. Алайда бұл қаражаттың қалай жұмсалғаны туралы есеп те, дәлел де ұсынылмаған.
БЛОГЕР ЖӘНЕ 80 МЛН ТЕҢГЕДЕН АСА ҚАРАЖАТ
Сотта жәбірленуші ретінде блогер Олжас Садық та сөз сөйледі. Ол да Перизат арқылы Газадағы тұрғындарға көмек жіберген. Оның айтуынша, ол әлеуметтік желі арқылы қазақстандықтардың көмегімен 83,5 млн теңге жинаған. Бастапқыда бұл қаражатты ЮНИСЕФ-ке жолдауды көздеген. Алайда оған Перизаттың өзі хабарласып, өз қоры жайлы айтып берген. Кейін олар бірге Абу-Дабиге сапарға шыққан, шығынның барлығын, жолақы мен тамақтануды Перизат өз мойнына алған. Алайда қысқа сапардан кейін Қазақстанға оралған соң, Перизат байланысқа шықпай кеткен.
ГАЗАДАҒЫ ЖАҒДАЙ
2023 жылғы 7 қазанда ХАМАС тобы Израильдің оңтүстігіне шабуыл жасап, бірнеше адамды тұтқынға алған. Бұған жауап ретінде Израиль Газа секторына әскери операция бастаған. Қақтығыс салдарынан Газа тұрғындары ауыр гуманитарлық және экономикалық жағдайға тап болды. Осы кезеңде көптеген қазақстандық азаматтар оларға көмектесу үшін белсенді түрде қаражат жинаған болатын.
