Қазақстанда Қытай гүлдеріне сұраныс артқан, деп хабарлайды Ulysmedia.kz.
ТОЛЫҒЫРАҚ
Синьхуа агенттігінің мәліметінше, Ганьсу провинциясындағы Линься-Хуэй автономды округінің жылыжайларынан жаңадан кесілген раушан гүлдерінің Алматыға дейінгі жеткізілу уақыты барынша қысқа – өнім жиналған сәттен бастап тұтынушының гүл құмырасына жеткенге дейін небәрі 48 сағат кетеді. Соңғы жылдары Қытайдың солтүстік-батысынан шығатын бұл хош иісті раушан гүлдері ел ішіндегі нарықпен қатар шетелдік нарықтарға да кеңінен таралып жатыр.
ҚАЗАҚСТАНДАҒЫ СҰРАНЫС АРТУДА
Аталған гүлдерді сыртқы нарыққа жеткізумен айналысатын компания басшысының орынбасары Ли Цзэтяньның айтуынша, Линься раушандарының жоғары сапасы оларды халықаралық нарықта бәсекеге қабілетті етіп отыр.
– “Бір белдеу – бір жол” бастамасы аясында нарықты зерттеу барысында біз Қазақстанда қытай гүлдеріне сұраныстың күрт артқанын байқадық. Бұл әріптестік үшін үлкен мүмкіндік, – деді Ли Цзэтянь.
Оның айтуынша, компанияда гүл жеткізудің тұрақты арналары бар және Алматының кедендік ресімдеудегі, қойма басқару мен өңірлік логистикадағы артықшылықтарын тиімді пайдалана алады.
“Хуачжичжоу” компаниясының соңғы мәліметіне сәйкес, 2024 жылдың бірінші жартыжылдығында Қазақстан, Қырғызстан және Орталық Азияның өзге де елдеріне 1,5 миллионнан астам жаңадан кесілген раушан гүлі экспортталған.
“АҚЫЛДЫ” ЖЫЛЫЖАЙЛАР
Теңіз деңгейінен 2 мың метр биіктікте орналасқан Линься-Хуэй автономды округі – мол күн шуағы мен құрғақ климатының арқасында жоғары сапалы раушан өсіруге қолайлы аймақ саналады.
“Инун халықаралық гүл порты” компаниясының агрофермасында жыл бойы гүлденетін “ақылды” жылыжайлар жұмыс істейді. Бұл заманауи технологиялар мен автоматтандырылған желдету мен температураны реттеу жүйелері, суару мен тыңайтқышты біріктіретін технология, залалсыздандыру құралдары арқылы мүмкін болып отыр. Мұндай жүйелер гүл өсірудің тұрақтылығы мен тиімділігін арттырған.
НЕ ӨСІРІЛЕДІ
Қазіргі таңда бұл жылыжайларда 8 түрлі түске ие 10 түрлі раушан сорты өсіріледі. Күнделікті өндіріс көлемі – 180 мың дана, ал жылдық өндіріс – 60 миллион дана гүлден асады.
