Алматы көшелерінде жүрген 166 автобус пен троллейбустарды сату жоспарланып отыр, деп хабарлайды Ulysmedia.kz.
АУКЦИОН ТУРАЛЫ
Электронды сауда алаңында Алматы облысында сақтаулы тұрған автобустар мен троллейбустарға қатысты лот жарияланды. Аукцион бағаны көтеру әдісімен өтеді, бастапқы құны – 37 666 225 теңге. Сауда 2 қыркүйекте басталады. Жеңімпаз көліктерді өзі шығарып әкетіп, «автобустар зиратынан» тыс жерде бөлшектеп, сыныққа өткізуге міндетті.
Бағалау есебіне сәйкес, аталған көліктер ұзақ уақыт бойы қараусыз, бос. Барлық автобус пен троллейбус жарамсыз күйде, кейбірінде қозғалтқышы жоқ немесе істен шыққан. Оларды қайта қалпына келтіру мүмкін емес, пайдалануға жарамайды.
ҚОҒАМДЫҚ ПІКІР
Бұған дейін әлеуметтік желілерде жарияланған жазбада бұл автобустардың көбі әлі кемінде он жыл қызмет ете алатыны айтылған. Осыдан кейін жұрт арасында Алматы техникадан «оңды-солды айрылып жатыр» деген пікірлер тарады.
