Қазақстандағы камералар ЖИ арқылы адамның бет-әлпетін тани алады. Бұл туралы ішкі істер министрі Ержан Сәденов айтты, деп хабарлайды Ulysmedia.kz.
КАМЕРАЛАР
Сәденовтің сөзінше, 19 мыңнан астам камера адамның бет жүзін тануға, өзге де заттарды зерделеуге, тіпті көлік ағындарын талдауға қабілетті жасанды интеллектімен жабдықталған.
- Бұл жүйелерді жедел басқару орталықтарымен біріктіру болып жатқан оқиғаларға нақты уақыт режимінде жауап беруге мүмкіндік береді. Полиция қызметкерлері заманауи планшеттермен және смарт-жетондармен жабдықталған. Бұл жұмыстың ұтқырлығы мен тиімділігін арттырады, дейді министр.
ЗАҢБҰЗУШЫЛЫҚ ТУРАЛЫ ХАБАРЛАУ
Азаматтарға ыңғайлы болу үшін «102» мобильді қосымшасына, сондай-ақ eGovMobile және екінші деңгейдегі банктердің қолданбасына «Заң және тәртіп» сервисі енгізілген. Енді кез-келген адам құқық бұзушылық туралы «бір батырма» арқылы хабарлай алады.
- Алаяқтардың 2,2 млрд теңге көлеміндегі қаражатты есеп-шоттардан шығарып әкету әрекеттерінің жолы кесілді. Сонымен қатар азаматтардың құқықтық және қаржылық сауаттылығы да артып келеді,— деді Ержан Сәденов.
