Руслан Берденов Шымкент қаласының әкімінің орынбасары қызметінен кетті, деп хабарлайды Ulysmedia.kz.
ТОЛЫҒЫРАҚ
Руслан Берденов өзінің өтініші бойынша Шымкент қаласы әкімінің орынбасары қызметінен кеткен. Ол бұл қызметті биылғы жылдың ақпан айынан бері атқарып келген.
Берденов 2023 жылдың наурызынан қала әкімінің орынбасары болып тағайындалғанға дейін Қазақстан Республикасы Парламенті VIII шақырылымының депутаты, Қаржы және бюджет комитетінің мүшесі болды.
СОТ
28 шілдеде Шымкенттегі сотта әкімнің орынбасарына, бұрынғы мәжіліс депутаты Руслан Берденовке қастандық жасау ісі бойынша атышулы сот процесі басталып, күдікті Ернар Жиембай 20 тамызда 9 жылға сотталды.
СОТТА НЕ АЙТЫЛДЫ
Айыпталушы Ернар Жиембай 6 тамызда өткен сот отырысында оқ ату жеке себептерден туындағанын алға тартты. Оның айтуынша, Руслан Берденов оның жұбайына көңіл білдіріп, жылы сөздер жазылған жеке хабарламалар жіберген.
Бір күні әйелінің телефонына «Сен сұлусың» деген хабарлама келген. Ол хабарламаны Берденов жіберіпті. Кейін Берденов Жиембайдың әйелінің суретіне лайк қойған.
Бұған қоса, айыпталушының сөзінше, Берденов оған келісім ұсынып, Шымкенттің қазіргі әкімі Ғабит Сыздықбековке қарсы жалған айғақ беруін өтінген.
