Алматы облысының Талғар қаласында белгісіз адам ер азаматты атып өлтіріп, кішкентай қызды алып кеткен, деп хабарлайды Ulysmedia.kz.
МӘН-ЖАЙ
Полиция мәліметінше, ер адамды өлтіру және бала ұрлау фактілері бойынша қылмыстық істер қозғалды.
Тергеудің алдын ала нұсқасы бойынша, күдікті қыздың анасымен бұрын жақын қарым-қатынаста болған. Араларында жанжал туындап, ер адам жәбірленушінің ағасына мылтықтан оқ атқан. Оқ тиген ер адам жарақатынан оқиға орнында қаза тапқан.
ДӘЙЕКСӨЗ
– Қылмыс жасағаннан кейін күдікті кәмелетке толмаған баланы ұрлап, ізін жасырған. Оның жеке басы мен жүрген жері анықталды, – делінген департамент хабарламасында.
Кейінірек полицияның арнайы жасағы кәмелет жасқа толмаған баланы құтқару операциясын сәтті жүргізгенін хабарлады.
Құқық қорғау органдары күдікті көп ұзамай қолға түсіп, одан атыс қаруы тәркіленгенін мәлімдеді.
Сондай-ақ құтқарылған қыз анасына тапсырылды. Дәрігерлер ұрланған баланың денсаулығын тексеріп жатыр.
