Үкімет отырысынан кейінгі брифингте журналистер ауыл шаруашылығы және сауда және интеграция министрлерінен етті қайдан алатынын және бағаның өсуін сезінген-сезінбегенін сұрады, деп хабарлайды Ulysmedia.kz.
Сауда министрі етті өзі базардан алады
Сауда және интеграция министрі Арман Шаққалиевтің айтуынша, ол жуырда елордадағы «Сауран» базарынан 1 келі етті 4200 теңгеге сатып алған. Бұл — сүйегі қоса салынған таза ет болған.
– Баға айырмашылығы расымен бар. Кәуапқа арналған қой еті немесе сиыр еті 5700 теңгеге дейін барады. Өйткені ол алдын ала дайындалып, қапталған ет. Яғни бәрі сіздің тұтынушылық сұранысыңызға байланысты, – деді ол.
Министрдің сөзінше, әлеуметтік тұрғыдан осал топтарға қолжетімді ет бөліктерін табуға болады.
– Егер сиыр етінің төс-жауырын бөлігін алсақ, бағасы 3000-нан 3700 теңгеге дейін өзгереді, – деді Арман Шаққалиев.
Ауыл шаруашылығы министрі делдалдарды айыптады
Ауыл шаруашылығы министрі Айдарбек Сапаров жауабын саладағы жағдайдан бастады.
– Біріншіден, мал шаруашылығы – ауыр сала, мұны білесіздер. Фермерлерге оңай емес. Екіншіден, ет жеткілікті. Үш күн бойы сауда министрлігімен бірге жұмыс тобы аясында рейд жүргіздік. Қазір фермерлер етті барлық базарда 3000-нан 3500 теңгеге дейін көтерме бағамен өткізіп жатыр, – деді ол.
Министрдің айтуынша, сиыр еті бағасының қымбаттауына делдалдар әсер етуде.
– Мысалы, олар фермерден 3200-ге сатып алып, бір сағаттың ішінде сауда желілеріне 3800-ге өткізеді. Осылайша әр келіден 600 теңге табыс табады. Сондықтан бұл бағыттағы жұмыстарды жалғастырамыз. Жалпы, егер фермер етті 3500-ге көтерме өткізсе, бөлшек саудада ол 4300-ден аспауы керек, – деп түсіндірді Айдарбек Сапаров.
Сонымен қатар, ол еттің соңғы бағасы малдың семіздігіне және сатып алушының қай бөлікті таңдағанына байланысты екенін айтты.
– Мен өзім етке базарға шықпаймын. Үйде етті жұбайым алады, бағасы шамамен 4000 теңге, – деді министр.
