Банктер салым бойынша уәде етілген пайыздарды әрқашан төлей бермейді. Мұның себебін тәуекел-менеджмент саласының маманы Ольга Эм түсіндірді, деп хабарлайды Ulysmedia.kz.
Табыс мөлшері
Digital Business мәліметінше, сарапшы қазақстандықтарды жарнамада көрсетілген пайызға емес, жылдық тиімді сыйақы мөлшерлемесіне (ЖТСМ) назар аударуға шақырды.
Оның айтуынша, банк тартымды көрсеткіштерді ұсынғанымен, пайыздар көбіне тек бастапқы сомаға ғана есептеледі, ал өсім есебінен қосылмайды. Кейде капитализация күтілгеннен сирек жасалады, нәтижесінде нақты табыс төмен болады. ЖТСМ барлық комиссияларды, төлем мерзімділігін және басқа да шарттарды ескереді, сондықтан депозиттерді салыстырғанда басты назар осы көрсеткішке аударылуы тиіс.
Уақытынан бұрын шешіп алу
Салымды мерзімінен бұрын жабумен байланысты тағы бір қауіп бар. Сарапшының сөзінше, мұндай жағдайда банк пайыздық мөлшерлемені ағымдағы шот ережесі бойынша қайта есептеуге құқылы. Мұнда пайыздық мөлшерлеме небары 0,1–2% шамасында болуы мүмкін.
– Соңында табыстылық күткеннен әлдеқайда төмен болып шығады. Бұған қоса, комиссиялар мен есептеу ережелеріне қатысты да нюанстар бар. Кейбір банктер шотты жүргізу, ақша аудару немесе валютаны конвертациялау үшін төлем алады. Сондай-ақ пайыздар күнтізбелік жылмен (365 немесе 366 күн) емес, «банктік жылмен» (360 күн) есептелуі мүмкін. Бұл да жылдық табыстылыққа бірнеше ондық пайыз айырмашылық әкеліп, жалпы кіріске әсер етеді, – деп түйіндеді Ольга Эм.
