Қазақстанда әйелдердің жұмыссыздық деңгейі ерлерден жоғары. Бұл туралы мәдениет және ақпарат министрі Аида Балаева мәлімдеді, деп хабарлайды Ulysmedia.kz.
МӘН-ЖАЙ
Балаеваның айтуынша, бұл – экономикалық теңсіздіктің айқын көрінісі. Әйелдер арасындағы жұмыссыздық деңгейі 5,3%-ға жетсе, ерлерде – небәрі 4,2%. Жалақыдағы гендерлік алшақтық 25,7%-ға дейін өскен. Министр бұл деректерді Алматыда өткен BeWoman форумын ашу барысында айтты.
Сонымен қатар, Аида Балаеваның сөзінше, бүгінде Қазақстандағы кәсіпкерлердің жартысына жуығы – әйелдер. Мемлекеттік қызметте бұл көрсеткіш одан да жоғары – 55%-дан асады.
Балаева Қазақстандағы ең «ерлерге тән» салаларға да тоқталды. Парламент депутаттарының шамамен 20%-ы ғана әйелдер. Дипломатия мен әскери салада әйелдердің үлесі аз: елшілердің 4%-ы, полиция қызметкерлерінің 16%-ы және армиядағы командалық лауазымдардағы әйелдер небәрі 4,4%.
– Дегенмен, біз дәл осы салаларда болашақта өсу әлеуетін және әйелдер лидерлігіне жаңа мүмкіндіктерді көріп отырмыз, – деп түйіндеді Балаева.
