АҚШ президенті Дональд Трамп ел астанасында өлім жазасына қатысты федералдық заңдардың орындалуын қамтамасыз етуді тапсырды, деп хабарлайды Ulysmedia.kz.
ТОЛЫҒЫРАҚ
Ақ үй сайтында жарияланған құжатқа сәйкес, Трамп президенттік меморандумға қол қойды. Онда АҚШ Бас прокуроры мен Колумбия округінің федералдық прокурорына ел астанасында жасалатын аса ауыр қылмыстарды тежеп, кінәлілерді ең қатаң жазаға тарту үшін өлім жазасы туралы заңдарды толық орындау тапсырылған.
Меморандумға сәйкес, егер дәлелдер мен мән-жайлар негізделсе, федералдық прокурорлар барлық тиісті істер бойынша өлім жазасын сұрауы тиіс. Сондай-ақ Бас прокурор мен федералдық прокурор өлім жазасын қолдануға болатын істерде федералдық юрисдикцияны барынша пайдалануы керек.
СЕБЕП
Трамптың мәлімдеуінше, бұл қадам АҚШ астанасының тұрғындары мен қонақтарын қорғауға, сондай-ақ зорлық-зомбылық жасаған қылмыскерлерге заңда қарастырылған ең қатаң жазаны қолдануға бағытталған.
– Кейбір саясаткерлер мен құқық қорғаушылардың қарсылығына қарамастан, өлім жазасы туралы федералдық заңдардың орындалуын қамтамасыз ету президент Трамп үшін басымдық болып қала береді. Президенттік қызметінің алғашқы күнінде ол №14164 Жарлыққа қол қойып, өлім жазасын заң жүзінде қайта қолдануды енгізген еді. Бүгінгі меморандум сол жарлықтың аясын кеңейтіп, Вашингтонда ең қауіпті қылмыскерлерге қатысты қоғамдық қауіпсіздік пен әділеттілікті қамтамасыз етудің маңызды тетігі ретінде өлім жазасын қолдануды тапсырды, – делінген құжатта.
КОНТЕКСТ
Ақ үйдің хабарлауынша, соңғы жылдары Колумбия округінде қылмыстық саясаттың «жұмсарып кетуі» қауіптің артуына, тұрғындар мен туристердің қауіпсіздігіне және федералдық мекемелердің жұмысына қатер төндірген.
