Қазақстан Республикасы Қаржы министрлігінің Мемлекеттік кірістер комитеті электромобиль әкелуді жоспарлап отырған азаматтарға белгіленген жеңілдік квотасын ескеруді ескертті, деп хабарлайды Ulysmedia.kz.
ТОЛЫҒЫРАҚ
Кеден одағы комиссиясының 2009 жылғы 27 қарашадағы №130 шешіміне сәйкес, электромобильдерге (ТН ВЭД коды 8703 80 000 2) әкелу кезінде тарифтік жеңілдік қарастырылған. Алайда бұл шешім бойынша Қазақстанға әкелінетін электромобильдер санына шектеу қойылған — барлығы 15 мың бірлік.
– 2025 жылғы 25 қыркүйектегі жағдай бойынша елге 13 мыңнан астам электромобиль жеткізілді. Бұл белгіленген лимиттің 87,2%-ына тең, – делінген хабарламада.
Осылайша, тарифтік жеңілдікпен әкелуге 1 900-ден аз электромобиль қалды.
КОМИТЕТТІҢ КЕҢЕСІ
Азаматтар автокөлікті сатып алу және әкелу туралы шешім қабылдар алдында қалған жеңілдік көлемін алдын ала ескергені жөн. Бұл мүмкін болатын шектеулерден сақтануға көмектеседі.
