Қарағандыда 15 жастағы қызды қалыңдық етіп алған азаматқа қатысты сот отырысы жүріп жатыр. Кәмелетке толмаған оқушының туған әкесі қызын ұзатып жіберген бұрынғы әйелі мен оның азаматтық некедегі күйеуін де жауапқа тартуды талап етіп отыр. Өйткені қызды еркінен тыс күйеуге бергендер куәгер ретінде ғана сұралып жатыр екен, деп хабарлайды Ulysmedia.kz "КТК" телеарнасына сілтеме жасап.
АБАЙ ҚАЛАСЫНДА БОЛҒАН
Оқиға Абай қаласында болған. Анасы мен өгей әкесі 15 жастағы қызын күйеуге беріп жіберген. Алайда ол бес күннен кейін туған әкесіне қашып келіпті. Ол бірден полицияға арыз жазады. Тәртіп сақшылары кәмелетке толмаған қызды әйел қылған 38 жастағы ер адамды Астанаға қашып бара жатқан жерінен ұстап, қамауға алды.
ӘКЕ-ШЕШЕСІ ТЕРІС АҒЫМ ӨКІЛДЕРІ
Қыздың анасы, өгей әкесі мен күдікті де теріс ағым өкілдері. Сол ағымның тәртібіне сай, баланы ересектің етегінен ұстатқан дейді қыздың туған әкесі. Оның қолындағы басқа балалар да осы күйді кешпес үшін білім бөлімі әйелді ата ана құқынан айыруды талап еткен. Бірақ сот арызды қанағаттандырмады. Қыздың әкесі істі тергеу тиісті деңгейде жүргізілмеген дейді.
“Қазір қамауда отырған күдікті қызымды үш рет зорлаған. Бұл ауыр қылмыс. Ал сол азғынның қойнына баланы салып берген менің бұрынғы әйелім мен күйеуі неге жауапқа тартылмайды? Олар куәгер ретінде ғана жүр. Менің қызым өз еркімен оған тұрмысқа шыққан жоқ қой. Күдікті бұлардың 10 жылдан бері араласатын жолдастары болып шықты. Соған ұзатқан”- дейді қыздың әкесі.
Сондықтан білім бөлімі Бас прокуратура мен Ішкі істер министрлігіне шағым түсірген.
