АҚШ президенті Дональд Трамп алдағы апталарда Қытай басшысы Си Цзиньпинмен Оңтүстік Кореяда кездесуді жоспарлап отыр. Бұл туралы ол Ақ үйде Канада премьер-министрі Марк Карнимен өткен кездесу барысында мәлімдеді, деп хабарлайды Ulysmedia.kz.
Трамптың айтуынша, ол ҚХР төрағасымен Оңтүстік Кореяда жүздеседі.
– Менің төраға Симен қарым-қатынасым тамаша. Өздеріңіз білесіздер, мен онымен бірнеше аптадан кейін кездесемін. Онымен Оңтүстік Кореяда жүздесемін. Бірақ біздің жақсы қарым-қатынасымыз бұрыннан жақсы, — деді Трамп.
Қытай басшысымен алдағы кездесу туралы Трамп 1 қазанда өзінің Truth Social парақшасында хабарлаған. Ол Си Цзиньпинмен келіссөздер барысында АҚШ пен Қытай арасында бұған дейін жасалған, Қытайдың америкалық ауыл шаруашылығы өнімдерін сатып алу міндеттемесін қарастыратын келісім мәселесін көтермек.
