Дональд Трамп жұма күні Ақ үйде өткен кездесуде Владимир Зеленскийді соғысты тоқтату үшін Ресейдің шарттарына келісуге шақырды. Ол Владимир Путиннің өзіне: егер Украина келіспесе, оны «жойып жіберетінін» айтқанын ескертті, деп хабарлайды Ulysmedia.kz.
МӘН-ЖАЙ
FT дерегі бойынша, АҚШ пен Украина президенттерінің кездесуі бірнеше рет айқай-шуға ұласқан. Трамп «үнемі ашулы күйде болған». Ол Украинадағы майдан шебінің картасын бір шетке лақтырып, Зеленскийден бүкіл Донбасты Путинге беруді талап еткен және бір күн бұрын Ресей басшысы айтқан уәждерді қайталап отырған.
Ақыры Украина Трампты қазіргі майдан шебін уақытша тоқтату туралы келісімге көндіргенімен, кездесу Трамптың соғысқа қатысты ұстанымының тұрақсыз екенін және Путиннің барынша талапшыл көзқарасын ескеруге дайын екенін көрсетті.
Зеленскийдің сапары АҚШ президентінің Израиль мен ХАМАС арасындағы бітімнен кейін соғысты аяқтауға бағытталған жаңа бастамасымен тұспа-тұс келді. Украина делегациясы Tomahawk қанатты зымырандарын жеткізуді сұраған, бірақ Трамп бас тартқан.
Кездесу биыл ақпанда болған шиеленісті эпизодты еске салды: ол кезде Трамп пен вице-президент Джей Ди Вэнс Зеленскийді «АҚШ-қа жеткілікті алғыс білдірмеді» деп сынға алған еді.
Еуропалық дипломаттардың айтуынша, жұма күні Трамп Путиннің дәл сол аргументтерін сөзбе-сөз қайталаған, тіпті олар оның Ресейдің әлсіздігі туралы бұрынғы мәлімдемелеріне қайшы келсе де. Бір еуропалық шенеунік Трамптың Зеленскийге:
- Сен келісімге баруың керек, әйтпесе жойыласың. Егер [Путин] қаласа, ол сенің көзіңді құртады, – дегенін айтты.
Кездесудің бір сәтінде АҚШ басшысы Украинадағы әскери жағдай көрсетілген карталарды итеріп тастаған. Ақ үй де, Украина президенті кеңсесі де түсініктеме беруден бас тартқан.
Fox News арнасына берген сұқбатында Трамп қақтығыстың жақын арада аяқталатынына сенімді екенін айтып, Путин «бірнәрсе алады, ол кейбір аумақтарды әлдеқашан жеңіп алды» деді.
Өткен аптада Путин Трампқа жаңа нұсқаны ұсынған: Украина өз бақылауындағы Донбастың қалған бөлігін беріп, есесіне оңтүстік майдандағы – Херсон және Запорожье облыстарының шағын аудандарын алады.
Бұл тамыз айында Аляскада өткен кездесумен салыстырғанда аздап «жұмсартылған» нұсқа еді. Сол кезде Путин Донбастың толық берілуін талап етіп, майданның қалған бөлігін қатырып қоюға дайын болған.
Алайда Донбасты беру Украина үшін мүмкін емес: Мәскеу бұл өңірдің бір бөлігін он жылдан астам уақыт бойы бақылауда ұстап келеді және 2022 жылғы басқыншылықтан бері оны толық басып алуға тырысып келеді, бірақ сәтсіз.
